Read Ўзбек тилидаги Муқаддас Китоб (ЎЗМК), 2013 Забур 110 Bible Online

Забур 110 - Ўзбек тилидаги Муқаддас Китоб (ЎЗМК), 2013 bible

Забур 110

¹[1]Эгамизга ҳамду санолар бўлсин! Тўғри инсонлар жамоасида бўлганимда, Бутун қалбимдан Эгамга шукр айтаман.

²Эгамизнинг ишлари буюкдир, Улардан лаззат олувчилар улар ҳақда фикр юритадилар.

³Эгамизнинг ишлари муҳташам, ҳайбатлидир, Унинг адолати то абад давом этади.

⁴Эгамиз унутилмас ажойиботларни яратди, У раҳмдил ва шафқатлидир.

⁵Ўзидан қўрққанларга ризқ–рўзини беради, Ўз аҳдини доимо ёдида тутади.

⁶Халқига қудратли ишларини кўрсатди, Бошқа халқлар ерини уларга берди.

⁷Ҳамма ишларида содиқ, адолатлидир, Унинг ҳамма амрлари ишончлидир.

⁸Уларнинг ҳаммаси то абад мустаҳкам туради, Эгамиз уларни садоқат, тўғрилик ила ижро қилди [2].

⁹У халқини қутқарди, То абад аҳди билан уларни Ўзига боғлади. Унинг номи муқаддас, қўрқинчлидир.

¹⁰Эгамиздан қўрқиш доноликнинг бошидир, Бундай йўл тутганларнинг ақли расодир, Унинг ҳамду санолари то абад давом этади.