Read Ўзбек тилидаги Муқаддас Китоб (ЎЗМК), 2013 Забур 140 Bible Online

Забур 140 - Ўзбек тилидаги Муқаддас Китоб (ЎЗМК), 2013 bible

Забур 140

¹Довуд саноси. [1] Сенга ёлвораман, эй Эгам, ёнимга тез келгин, Сенга ёлворганимда овозимга қулоқ солгин.

²Ибодатимни тутатқи назридай қабул қилгин, Қўлларимни кўтарганимни кечки қурбонлик деб билгин.

³Эй Эгам, оғзимга посбон қўйгин, Лабларим эшигини қўриқлагин.

⁴Юрагимни қабиҳликка бурмагин, Ёмон ишларга қўшилишимга йўл қўймагин, Бадкирдорларнинг жамоасида Зиёфатларини ейишимга йўл қўймагин.

⁵Майли, солиҳ одам мени ураверсин, Содиқ одам мени тўғриласин, Бошим шундай аъло мойни рад қилмасин. Менинг ибодатим муттасил Бадкирдорларнинг қабиҳ ишларига қаршидир.

⁶Уларнинг ҳакамлари қоядан улоқтирилади, Шунда фосиқлар сўзларим ҳақ эканлигини билиб олишади.

⁷Бадкирдорлар айтар: “Шудгор қилиниб, парчаланган ердай, Суякларимиз қабр [1] оғзида майдаланиб, сочилиб ётибди.”

⁸Кўзларим Сендадир, эй Эгам Раббий, Сендан паноҳ излайман, Мени ташлаб қўймагин.

⁹Бадкирдорларнинг қопқонларидан, Улар қўйган тузоқдан мени сақлагин.

¹⁰Мен соғ–омон ўтиб кетайин, Фосиқлар ўзлари қўйган тўрга тушсин.