Read Ўзбек тилидаги Муқаддас Китоб (ЎЗМК), 2013 Забур 143 Bible Online

Забур 143 - Ўзбек тилидаги Муқаддас Китоб (ЎЗМК), 2013 bible

Забур 143

¹Довуд саноси. [1] Эгамга, суянган қоямга олқишлар бўлсин, У қўлларимни урушга, бармоқларимни жангга ўргатган.

²Эгам менинг суянган қоямдир, қалъамдир, У қўрғоним, халоскоримдир. Ҳа, Эгам менинг қалқоним, Унда мен паноҳ топаман, Халқларни [1] У менга бўйсундиради.

³Эй Эгам, инсон зоти кимдирки, унга эътибор берсанг! Бандалар [2] кимдирки, улар ҳақда ўйласанг!

⁴Инсон умри оғиздан чиққан нафасга ўхшар, Одамзоднинг ҳаёти ўткинчи сояга ўхшар.

⁵Эй Эгам, кўкларни ёриб, пастга тушгин, Тоғларга теккин, улардан тутун чиқсин.

⁶Чақмоқ чақтир, ёвларни тирқиратгин, Ўқларингни от, уларни саросимага солгин.

⁷Юқоридан узат қўлингни, мени қутқаргин, Азим сувлардан мени чиқариб олгин, Бегоналар қўлидан мени қутқаргин.

⁸Уларнинг сўзлари беҳуда, Қўлини кўтариб, улар ёлғон қасам ичади.

⁹Эй Худо, Сенга янги қўшиқ куйлайман, Ўн торли арфа чалиб Сени тараннум этаман.

¹⁰Шоҳларга Сен зафар ато этасан, Қулинг Довудни шафқатсиз қиличдан қутқарасан.

¹¹Келгиндиларнинг қўлидан Мени халос қил, қутқаргин. Уларнинг сўзлари беҳуда, Қўлини кўтариб, улар ёлғон қасам ичади.

¹²Ўғилларимиз ёшлигида яхши ўсган кўчатга ўхшасин, Қизларимиз саройнинг ўймакор устунларига ўхшасин.

¹³Омборларимиз ноз–неъматларга тўлиб–тошсин, Қўйларимиз минглаб, ўн минглаб яйловларда кўпайсин.

¹⁴Ҳўкизимиз оғир юкларни тортсин [3], Деворларимиз дарз кетмасин, Одамларимиз сургун бўлмасин, Кўчаларимизда оҳ–воҳ, ғаму кулфат бўлмасин.

¹⁵Нақадар бахтлидир бундай инсонлар! Бахтлидир Худони Эгамиз деб билган халқ!