Read Ўзбек тилидаги Муқаддас Китоб (ЎЗМК), 2013 Ҳикматлар 11 Bible Online

Ҳикматлар 11 - Ўзбек тилидаги Муқаддас Китоб (ЎЗМК), 2013 bible

Ҳикматлар 11

¹Ёлғон тарози Эгамиз учун жирканчдир, аниқ тарози тошлари эса Унинг қувончидир.

²Мағрурлик билан шармандалик келади, донолик эса камтарлар биландир.

³Тўғриларнинг софдиллиги йўл кўрсатса, хоинларнинг иккиюзламачилиги ҳалок қилади.

⁴Қиёмат кунида бойлик фойда бермайди, солиҳлик эса ўлимдан сақлайди.

⁵Покдилнинг солиҳлиги йўлини тўғрилайди, фосиқ эса фосиқлиги туфайли қоқилади.

⁶Tўғрининг солиҳлиги нажот беради, сотқин эса ёмон ниятлари туфайли тутилади.

⁷Ёвуз ўлса, орзу–умидлари ҳам ўлади, фосиқнинг ҳам хоҳиш–тилаклари поймол бўлади.

⁸Солиҳ ғам–ғуссадан қутулади, фосиқ эса ғамга дучор бўлади.

⁹Имонсиз тили билан қўшнисини ҳалок қилади, солиҳ эса илм–маърифати туфайли нажот топади.

¹⁰Солиҳнинг иши юришса, эл–юрт қувонади, фосиқ ҳалок бўлса, тантана бўлади.

¹¹Тўғри одамлар туфайли шаҳар баракали бўлади ва юксалади, фосиқнинг тилидан эса эл–юрт вайрон бўлади.

¹²Қўшнисини камситган ақлсиздир, идрокли сукут сақлайди.

¹³Ғийбатчи сирларни очади, содиқ эса сир сақлайди.

¹⁴Йўл–йўриқ кўрсатувчиси бўлмаган халқ ҳалок бўлади, маслаҳатчилар кўп бўлса, ғалаба келади.

¹⁵Бегонага кафиллик қилган кўп жабр кўради, кафил бўлишдан нафратланадиган эса тинчгина юради.

¹⁶Меҳрибон хотин иззат–ҳурмат топади, зўравон эса бойлик.

¹⁷Раҳмдил ўз жонига манфаат келтиради, бағритош эса ўзига зарар етказади.

¹⁸Солиҳлик тарқатадиганлар ҳақиқий мукофот, фосиқлар эса ёлғон мукофот оладилар.

¹⁹Солиҳликни кўзлаган инсон ҳаётга, ёмонликни кўзлаган эса ўз ўлимига эришади.

²⁰Эгри юрак Эгамизга жирканч, покларнинг ишлари эса Унинг қувончидир.

²¹Фосиқ албатта жазосиз қолмайди, солиҳнинг эса авлодлари ҳам нажот топадилар.

²²Чиройли, аммо фаросатсиз аёл, бурнига тилла сирға таққан чўчқа мисол.

²³Солиҳнинг хоҳиши фақат эзгулик, фосиқнинг кутганлари эса қаҳр–ғазабдир.

²⁴Баъзиларнинг қўли очиқ, аммо бойлиги кўпаяверади. Баъзилар лозим бўлганни беришга қизғанса ҳам қашшоқлашаверади.

²⁵Сахийнинг бири икки бўлади, бошқаларга яхшилик қилганнинг ўзи ҳам яхшилик кўради.

²⁶Ғалласини қизғанганни халқ қарғайди, сотганларга эса барака ёғилади.

²⁷Эзгуликка интилган илтифот топади, ёмонлик қидирганга эса ёмонлик келади.

²⁸Бойлигига ишонган хонавайрон бўлади, солиҳ эса барг каби яшнайди.

²⁹Ўз оиласига ғам–ташвиш келтирадиган мерос олмайди, нодон эса донога қул бўлади.

³⁰Солиҳларнинг маҳсули — ҳаёт дарахти, оқилу донолар одамларнинг юрагидан жой олади.

³¹Дунёда солиҳ қанча тақдирланса, фосиқ билан гуноҳкор ундан ҳам кўпроқ жазоланади.