Read Ўзбек тилидаги Муқаддас Китоб (ЎЗМК), 2013 Ҳикматлар 12 Bible Online

Ҳикматлар 12 - Ўзбек тилидаги Муқаддас Китоб (ЎЗМК), 2013 bible

Ҳикматлар 12

¹Насиҳатни севган илм–маърифатни севади, танбеҳдан нафратланадиган эса аҳмоқдир.

²Яхши одам Эгамизнинг марҳаматига сазовор бўлади, нияти бузуқни эса У жазога ҳукм этади.

³Инсон ёвузлик билан камол топмайди, солиҳ ҳеч қачон ўрнидан қўзғатилмайди.

⁴Яхши хотин эрининг бошидаги тожидир, эрини уялтирадиган хотин бошга балодир.

⁵Солиҳнинг фикри–зикри — адолат, фосиқнинг маслаҳати эса ёлғондир.

⁶Фосиқнинг сўзи қонга ташна, тўғрининг тили эса қутқаради.

⁷Фосиқ ҳалокатга учраб йўқ бўлади, солиҳнинг уйи эса мустаҳкам туради.

⁸Инсонни ақл–идрокига қараб улуғлайдилар, эгри одам эса нафратга дучор бўлади.

⁹Ўзини катта тутиб нонга зор бўлгандан, оддий бўлиб хизматкор бўлиш яхшироқ.

¹⁰Солиҳ ҳайвонга ҳам меҳрибонлик қилади, фосиқнинг раҳмдиллиги ҳам золимликдир.

¹¹Ерга ишлов берган тўйиб нон ейди, бекор нарсани кўзлаган эса ақлсиздир.

¹²Фосиқ ёвузлик тўрига илинтирай дейди, солиҳнинг илдизи яшнайди.

¹³Фосиқ тилининг гуноҳи билан тутилади, солиҳ эса ғамдан фориғ бўлади.

¹⁴Одам сўзлари туфайли яхши нарсага эришади, меҳнати уни тақдирлайди.

¹⁵Нодон ўз йўлини тўғри деб ўйлайди, доно эса маслаҳатга қулоқ солади.

¹⁶Нодон ғазабини дарҳол билдиради, ақли расо эса ҳақоратланганини беркитади.

¹⁷Тўғри гапирадиган ҳақиқатни айтади, сохта гувоҳ ёлғон гапиради.

¹⁸Ўйламасдан айтилган сўз қиличдай жароҳатлайди, дононинг гаплари эса шифо беради.

¹⁹Ростгўй лаблар абадийдир, ёлғон тил эса бир лаҳзаликдир.

²⁰Ёмон ният қиладиганнинг юрагида ёлғон, тинчлик ўрнатганда эса қувонч бор.

²¹Солиҳга ҳеч қандай зарар тегмайди, фосиқ эса ғам–ғуссадан қутулмайди.

²²Ёлғончи тил Эгамизга жирканч, тўғрилик билан иш қиладиганлар эса Унинг севинчидир.

²³Ақлли билимини кўз–кўз қилмайди, нодон ўз нодонлигини ошкор қилади.

²⁴Тиришқоқ ҳукм суради, дангаса эса қул бўлади.

²⁵Юракдаги қайғу–алам одамни эзади, ширин сўз эса юракни шод этади.

²⁶Солиҳ ўзгаларга йўл кўрсатади [1], фосиқ эса йўлдан адаштиради.

²⁷Дангаса ўлжасини пиширишга ҳам эринади, ғайратли эса қимматбаҳо бойликка эга бўлади [2].

²⁸Солиҳликнинг йўлида ҳаёт, бу йўлда ўлим йўқдир.