Read Ўзбек тилидаги Муқаддас Китоб (ЎЗМК), 2013 Ҳикматлар 13 Bible Online

Ҳикматлар 13 - Ўзбек тилидаги Муқаддас Китоб (ЎЗМК), 2013 bible

Ҳикматлар 13

¹Ақлли фарзанд [1] отасининг насиҳатларини қабул қилади, мазах қилувчи эса танбеҳга қулоқ солмайди.

²Яхши одам сўзлари билан яхшиликка эришади, хоин эса зўравонликка.

³Тилини тийган жонини асрайди, тилига эрк берган эса ҳалокатга учрайди.

⁴Дангасанинг кўнгли хоҳлайди–ю, аммо ҳеч нарсага эриша олмайди, тиришқоқ эса орзусига етишади.

⁵Солиҳ ёлғондан нафратланади, фосиқ эса уятли ва шармандали ишлар қилади.

⁶Солиҳлик тўғри юрадиганни ҳимоя қилади, фосиқлик эса гуноҳкорни ҳалок қилади.

⁷Шундай одам бор, ҳеч нарсаси йўғ–у, ўзини бой кўрсатади. Яна шундай одам бор, бойлиги кўп–у, ўзини қашшоқ кўрсатади.

⁸Жоннинг ҳақи — унинг бойлиги, камбағал эса дўқ–пўписадан қўрқмайди.

⁹Солиҳларнинг чироғи доим чароғон, фосиқники эса ўчиб қолади.

¹⁰Мағрурликдан фақат уруш чиқади, насиҳатга қулоқ солган одамда эса донолик бор.

¹¹Ҳийла билан топилган давлат йўқолади, меҳнат билан топилгани эса кўпаяди.

¹²Рўёбга чиқмаган умид юракни эзади, ушалган орзу эса ҳаёт дарахтидир.

¹³Панд–насиҳатлардан нафратланган ўзига ҳалокат келтиради, амрга қулоқ солган эса тақдирланади.

¹⁴Дононинг таълимоти — ҳаёт манбаи, одамни ўлим тузоғидан халос этади.

¹⁵Идрокли инсон марҳаматга эришади, хоиннинг йўли эса машаққатлидир [2].

¹⁶Зукко одам ақл билан иш қилади, ақлсиз эса аҳмоқлигини кўрсатади.

¹⁷Ёмон хабарчи кулфат олиб келади, содиқ хабарчи эса юракка шифо келтиради.

¹⁸Насиҳатга қулоқ солмаганларга қашшоқлик ва уят, танбеҳга қулоқ солганларга эса ҳурмат–иззат.

¹⁹Амалга ошган тилак жонга роҳат беради, нодон одам ёмонликдан айрилишни рад этади.

²⁰Доно билан юрган доно бўлади, аҳмоққа йўлдош бўлган эса ҳалок бўлади.

²¹Бахтсизлик гуноҳкорнинг кетидан қувиб юради, солиҳнинг мукофоти эса бахт–саодатдир.

²²Яхши одам болаларининг болаларига ҳам мерос қолдиради, фосиқнинг бойлиги эса солиҳга насиб этади.

²³Камбағалнинг даласида ғалла мўл, лекин адолатсизлик туфайли вайрон бўлади.

²⁴Калтакни аяган одам ўғлини ёмон кўради, ўғлини севган эса ёшликдан тартиб–интизомга ўргатади.

²⁵Солиҳ қорни тўйиб овқат ейди, фосиқ эса оч қолади.