Read Ўзбек тилидаги Муқаддас Китоб (ЎЗМК), 2013 Ҳикматлар 17 Bible Online

Ҳикматлар 17 - Ўзбек тилидаги Муқаддас Китоб (ЎЗМК), 2013 bible

Ҳикматлар 17

¹Дастурхони тўла жанжалли уйдан, бир тишлам қаттиқ нони бор тинч хонадон яхшироқ.

²Шармандали иш қиладиган ўғил устидан фаросатли қул ҳукмронлик қилади, у ака–укалар қатори меросга шерик бўлади.

³Кумуш, олтин оловда синалади, одамларнинг қалбини эса Эгамиз синайди.

⁴Фосиқлар ёвуз одамларнинг гапига киради, ёлғончи эса ғийбатга қулоқ солади.

⁵Камбағални мазах қилган уларни Яратганни таҳқирлайди, қийинчиликда қувонадиган жазосиз қолмайди.

⁶Набиралар — кексаларнинг тожу тахти, ўғилларнинг шон–шуҳрати оталаридир.

⁷Яхши сўз нодонга ярашмагандек, ёлғончилик улуғсифат одамга асло тўғри келмайди.

⁸Пора эгасининг назарида сеҳрли қимматбаҳо тош, гўё ҳамма ерда омад келтиради.

⁹Гуноҳни беркитган дўстликни сақлайди, уни кавлаштирган эса дўстни узоқлаштиради.

¹⁰Донога берилган битта танбеҳ нодоннинг бошида синган юзта калтакдан таъсирлироқ.

¹¹Фосиқ фақат ғалаён пайида бўлади, шунинг учун унга ёвуз элчи юборилади.

¹²Тентакнинг аҳмоқлигига йўлиққандан кўра, болаларидан айрилган она айиққа дуч келган яхшироқ.

¹³Яхшиликка ёмонлик қилганнинг хонадонидан ёмонлик аримайди.

¹⁴Жанжалнинг бошланиши — сув уриб кетишидай, чиқмай туриб уни тўхтат.

¹⁵Фосиқни оқлаш, солиҳни айблаш — иккови ҳам Эгамизга жирканчдир.

¹⁶Бу нима?! Нодоннинг қўлида бойлик бор, “Донолик сотиб олай”, — дейди, лекин унда ақл йўқ.

¹⁷Дўст ҳар қачон севиш учундир, ака–укалар ҳам оғир кун учун туғилган.

¹⁸Қўл ташлаб бировга кафиллик қиладиган ақлсиздир [1].

¹⁹Гуноҳни яхши кўрган уруш–жанжални севар, ўзига бино қўйган [2] ҳалокат қидирар.

²⁰Маккор юракли яхшиликка эришмайди, эгри тил эса кулфатга дучор бўлади.

²¹Нодон фарзандли бўлиш қайғу келтиради, аҳмоқнинг отаси эса шодлик нималигини билмайди.

²²Шод юрак — шифобахш дори, ғам–кулфат эса жоннинг эговидир.

²³Фосиқ қўйнидан пора олиб адолат йўлини ўзгартиради.

²⁴Фаҳм–фаросатли инсон доноликка қарайди, нодоннинг кўзи эса дунёнинг нариги четида.

²⁵Аҳмоқ фарзанд [3] — отасига қайғу, уни туққан онага эса ғамдир.

²⁶Солиҳни жазолаш, амалдорни одиллиги учун койиш яхши эмас.

²⁷Кам гапирган — доно, оғир, вазмин эса идроклидир.

²⁸Аҳмоқ ҳам индамай ўтирса доно, тилини тийган эса фаросатли ҳисобланади.