Read Ўзбек тилидаги Муқаддас Китоб (ЎЗМК), 2013 Ҳикматлар 19 Bible Online

Ҳикматлар 19 - Ўзбек тилидаги Муқаддас Китоб (ЎЗМК), 2013 bible

Ҳикматлар 19

¹Тўғри юрадиган камбағал эгри тилли аҳмоқдан яхшироқ.

²Билимсиз истак яхши эмас, шошқалоқлар эса қоқилади.

³Нодоннинг нодонлиги ҳаётини бузади–ю, Эгамиздан жаҳли чиқади.

⁴Бойлик дўстлар устига дўст келтиради, камбағал эса дўстидан ҳам айрилади.

⁵Сохта гувоҳ жазосиз қолмайди, ёлғон гапирувчи эса қочиб қутулмайди.

⁶Аъёнларнинг марҳаматини истайдиган кўп, совға берувчига эса ҳамма дўстдир.

⁷Камбағалдан ҳамма ака–укалари нафратланади, дўстлари ҳам узоқлашади, қидирганда уларнинг изи ҳам йўқ.

⁸Доноликка эришган ўз жонини севади, фаросатли бўлган эса яхшилик топади.

⁹Сохта гувоҳ жазосиз қолмайди, ёлғончи ҳалок бўлади.

¹⁰Ҳашаматли яшаш аҳмоққа ярашмаганидек, хўжайин устидан ҳокимлик қилиш қулга ҳам тўғри келмайди.

¹¹Одамнинг ақли жаҳлини тияди, гуноҳни кечириш унга шуҳрат келтиради.

¹²Шоҳнинг ғазаби шернинг ўкиришига ўхшайди, муруввати эса майсадаги шабнам кабидир.

¹³Нодон ўғил отасига ташвиш, хотиннинг жанжали эса бетўхтов томадиган томчидайдир.

¹⁴Уй ва бойлик — отадан мерос, фаросатли хотин эса Эгамиздандир.

¹⁵Дангасалик одамни уйқучи қилади, ялқов эса оч қолади.

¹⁶Амрларга амал қилган ўз жонини асрайди, ўз ҳаётини хор қилган эса ўлади.

¹⁷Камбағалга раҳм қилиш — Эгамизга қарз беришдай, У яхшиликни қайтаради.

¹⁸Умид бор экан, фарзандингни [1] тарбия қил, бузилиб, нобуд бўлишига йўл қўйма.

¹⁹Жаҳлдор жазосини олади, уни бир қутқарсанг яна қутқаришингга тўғри келади.

²⁰Насиҳатга қулоқ сол, панд–ўгитни қабул қил, шунда умринг бўйи оқил бўласан.

²¹Инсоннинг юрагида ният кўп, лекин фақат Эгамизнинг айтгани амалга ошади.

²²Инсоннинг истаги — садоқатли севги, камбағал ёлғончидан яхшироқдир.

²³Эгамиздан қўрқиш [2] ҳаётга элтади, одам ҳузур–ҳаловатда яшаб ташвишга учрамайди.

²⁴Дангаса қўлини косага чўзади–ю, оғзига олиб келишга эринади.

²⁵Мазах қилувчини уриш! Шунда содда [3] одамларга ақл киради. Фаросатлига танбеҳ берсанг, билими ошади.

²⁶Отасига зўравонлик қилиб, онасини ҳайдаган ўғил уят ва шармандалик келтиради.

²⁷Эй, ўғлим [4], агар насиҳатга қулоқ тутмасанг, илм–маърифатдан юз ўгирган бўласан.

²⁸Маккор гувоҳ адолат устидан кулади, фосиқнинг оғзи ёвузликни ўзига олади.

²⁹Мазах қилувчиларга ҳукм, нодонларга эса калтак тайёрдир.