Read Ўзбек тилидаги Муқаддас Китоб (ЎЗМК), 2013 Ҳикматлар 22 Bible Online

Ҳикматлар 22 - Ўзбек тилидаги Муқаддас Китоб (ЎЗМК), 2013 bible

Ҳикматлар 22

¹Яхши ном — энг катта бойликдан ортиқ, марҳаматга сазовор бўлиш эса кумушу олтиндан ҳам яхши.

²Бой билан камбағалнинг бир ўхшашлиги бор, икковини ҳам Эгамиз яратган.

³Эс–ҳушли хавф–хатарни кўриб яширинади, содда [1] эса тўхтамасдан бораверади, шунинг учун қийналади.

⁴Камтарлик ва Эгамиздан қўрқиш [2] бойлик, ҳурмат ва ҳаёт келтиради.

⁵Эгрининг йўлида тиканзор ва тузоқлар бор, ўз жонини асраган ундан узоқлашади.

⁶Болани тўғри йўлга солиб тарбияла, шунда қариганда ҳам йўлидан адашмайди.

⁷Бойлар камбағаллар устидан ҳукмронлик қилади, қарздор эса қарз берганнинг қулидир.

⁸Фосиқликни эккан ташвиш йиғади, жаҳл қамчиси эса синади.

⁹Сахий барака топади, чунки ўз нонини камбағаллар билан баҳам кўради.

¹⁰Мазах қилувчини орадан қув! Шунда ғавғо кетади, жанжалу ҳақорат ҳам барҳам топади.

¹¹Покдилликни севиб, хушмуомала бўлганга шоҳ дўст бўлади.

¹²Эгамиз илм–маърифатли инсонни асрайди, У хоиннинг сўзларини пучга чиқаради.

¹³Дангаса: “Ташқарида шер бор, кўчада мени ўлдиради”, — дейди.

¹⁴Бузуқ аёлнинг оғзи тубсиз чоҳдир, Эгамизнинг ғазабига учраганлар унга тушади.

¹⁵Ақлсизлик боланинг дилига ўрнашган, танбеҳ қамчиси уни ажратиб юборади.

¹⁶Бой бўламан деб қашшоқни эзган ҳам, бойга совға қилган ҳам камбағаллашади.

¹⁷Доноларнинг сўзларига қулоқ тут, қалбингни билимимга оч.

¹⁸Чунки бу сўзларни қалбингда сақласанг, дилинг яшнайди, улар доим тилингда тайёр бўлсин.

¹⁹Эгамизга умид боғлагин деб бугун шуларни ўргатяпман.

²⁰Сенга билим ва маслаҳат билан ўттизта насиҳат ёзиб бермаганмидим?!

²¹Бу ҳақиқат сўзларини ўрганиб, сени юборганларга айтиб беришинг учун эди.

²²Камбағалдан камбағаллиги учун ўғирлама, бахтсизни дарвоза олдида ҳукм қилганда қийнама.

²³Чунки Эгамиз ҳимоя қилиб, улардан олганнинг жонини олади.

²⁴Уришқоқ билан дўстлашма, баджаҳл билан юрма.

²⁵Бўлмаса сен ҳам уларнинг йўлига тушиб қоласан, жонингни тузоққа илинтирасан.

²⁶Бегона билан қўл ташлашма, ўзганинг қарзига кафиллик берадиганларнинг бириси бўлма [3].

²⁷Тўлаш учун ҳеч нарсанг бўлмаса, нега тагингдаги тўшагингни олиб кетиши керак?!

²⁸Ота–боболаринг қўйган қадимий чегараларни бузма [4].

²⁹Ўз ишига моҳир устани кўрганмисан? У оддий одамларга эмас, шоҳга хизмат қилади.