Read Ўзбек тилидаги Муқаддас Китоб (ЎЗМК), 2013 Ҳикматлар 24 Bible Online

Ҳикматлар 24 - Ўзбек тилидаги Муқаддас Китоб (ЎЗМК), 2013 bible

Ҳикматлар 24

¹Фосиқларга ҳавас қилма, улар билан бирга бўлишга интилма.

²Чунки улар зўравонликни ният қилади, тиллари эса ёмонликни гапиради.

³Уй донолик билан қурилади, идрок билан мустаҳкам бўлади.

⁴Хоналар эса билим билан турли қимматбаҳо, қимматли бойликка тўлади.

⁵Доно сипоҳлар кучли сипоҳлардан [1], илм–маърифатлилар эса кучи борлардан қудратлироқдир.

⁶Яхши одам йўл–йўриқ билан урушга боради, маслаҳатчилар кўплиги туфайли ғалаба қилади.

⁷Аҳмоқ доноликка етишмайди, ҳукмда оғзини оча олмайди.

⁸Ёмон ният қилувчининг номи шаккокдир.

⁹Аҳмоқлик билан тузилган режа гуноҳдир, мазахчидан одамлар жирканади.

¹⁰Ташвишли кунда ожиз бўлганнинг кучи камдир.

¹¹Ўлимга маҳкум бўлганларни, дорга олиб кетилаётганларни қутқар.

¹²“Билмайман”, — десанг ҳам, юракни синайдиган Худо кўрмайдими, жонни асрайдиган буни билмайдими? Ҳаммага уларнинг ишига яраша қайтармайдими?

¹³Ўғлим [2], асал еб кўргин, у яхши, асалари муми оғзингга шириндир.

¹⁴Донолик жонингга асалдайдир, унга эришсанг келажагингни топасан, умидинг рўёбга чиқади.

¹⁵Эй, фосиқ, солиҳнинг уйига пистирма қурма, уй–жойига тегма.

¹⁶Солиҳ етти марта йиқилса ҳам туриб кетаверади, фосиқ эса ҳалокатга учрайди.

¹⁷Душманинг йиқилганда севинма, қоқилгани учун юрагинг қувонмасин.

¹⁸Бўлмаса Эгамиз буни кўриб ёқтирмай, ғазабини ундан ўгиради.

¹⁹Фосиқлардан жаҳлинг чиқмасин, ёмонларга ҳавас қилма.

²⁰Чунки ёмонларнинг келажаги йўқ, фосиқларнинг чироғи эса ўчиб қолади.

²¹Эй, ўғлим, Эгамиздан ҳам, шоҳдан ҳам қўрқ, уларга қарши бош кўтарма [3].

²²Чунки улардан кулфат кутилмаганда келади, икковидан келадиган ҳалокатни ким билади?!

²³Қуйидаги сўзлар ҳам донолардан. Ҳукмда тарафгарчилик қилиш яхши эмас.

²⁴Фосиққа “солиҳсан” деганни эл лаънатлайди, халқлар ундан нафратланади.

²⁵Унга танбеҳ берганлардан хурсанд бўлади, улар қут–барака топадилар.

²⁶Тўғри жавоб берадиганларни эса ҳамма севади.

²⁷Ташқаридаги юмушингни бажар, даладаги барча ишларингни тартибга сол, кейин уйингни қургин.

²⁸Сабабсиз ўзгага қарши гувоҳлик берма, тилинг билан алдама.

²⁹“Менга нима қилган бўлса, мен ҳам шундай қиламан, қилмишига яраша қайтараман”, — дема.

³⁰Дангасанинг даласидан, нодоннинг узумзори ёнидан ўтдим.

³¹Ана, ҳамма ёқ тиканзор, ҳамма ерда қичитқи ўт, тош девор ҳам қулаб, ер билан битта бўлиб ётибди.

³²Қараб, ўйлаб кўрдим, уни кўриб сабоқ олдим.

³³“Бироз ухлай, бир мизғиб олай, ёнбошлаб бирпас дам олай”, — дейди.

³⁴Шунинг учун қашшоқлик йўлтўсардай, муҳтожлик эса қароқчидай устига келади.