Read Ўзбек тилидаги Муқаддас Китоб (ЎЗМК), 2013 Ҳикматлар 25 Bible Online

Ҳикматлар 25 - Ўзбек тилидаги Муқаддас Китоб (ЎЗМК), 2013 bible

Ҳикматлар 25

¹Қуйидагилар ҳам Сулаймоннинг ҳикматларидир. Бу ҳикматлар Яҳудо шоҳи Ҳизқиёнинг [1] одамлари томонидан ёзиб олинган.

²Сирли қилиш — Худонинг шуҳрати [2], ишларни текшириб билиш эса шоҳ шарафидир.

³Осмон баланд, денгиз чуқур, шоҳнинг юраги ҳам шундай, уни тушуниш қийин.

⁴Кумушдан чиқиндини олиб ташла, ўшанда яхши идиш қолади.

⁵Фосиқни шоҳ олдидан чиқариб ташла, шунда шоҳнинг тахти ҳақиқат билан мустаҳкам бўлади.

⁶Шоҳнинг олдида ўзингни юқори қўйма, улуғ одамлар турганда тўрига чиқма.

⁷Чунки ўзинг кўриб турган амирлар олдида биров сени пойгакка туширгандан кўра, “Тўрига ўтинг” дегани яхшироқ.

⁸Шошилиб арз қилма, охирида қўшниларнинг олдида уялиб қолсанг нима бўлади?

⁹Қўшнингнинг ўзи билан гаплаш, сирни бошқаларга очма.

¹⁰Бўлмаса, эшитганлар сени уятга қўяди, номинг бир умрга ёмон бўлади.

¹¹Ўз ўрнида айтилган сўз тилла узукка қўйилган ёқут кўздайдир.

¹²Дононинг танбеҳи тинглаган қулоққа тилла сирға ва олтин безакдайдир.

¹³Садоқатли хабарчи уни юборганларга ўрим пайтидаги қордайдир, хўжайинининг қалбини севинтиради.

¹⁴Қилмаган совғаси билан мақтанадиган одам ёмғирсиз булут ва шамол кабидир.

¹⁵Сабр–тоқат билан гапирилса амалдор ҳам кўнади, мулойим сўз эса тошни ҳам синдиради.

¹⁶Асал топсанг, етарлича егин, ортиқчаси қайт қилдиради.

¹⁷Қўшнингникига ҳадеб кираверма, бўлмаса сендан безиб, ёмон кўриб қолади.

¹⁸Ўзгага қарши сохта гувоҳлик берган одам болта, қилич, ўткир ўққа ўхшайди.

¹⁹Ташвишли кунда вафосизга суяниш, синган тиш ва чўлоқ оёққа ишониш кабидир.

²⁰Ғамгин одам олдида қўшиқ айтиш аёзда уст–бошини ечиб ташлагандай, жароҳатга сирка суртиш кабидир.

²¹Душманинг оч бўлса, овқат бер, чанқаган бўлса, сув ичир.

²²Шунда унинг бошига ёнаётган чўғ йиққандай бўласан, Эгамиз эса сени тақдирлайди.

²³Шимолдан эсадиган шамол жала, ғийбат эса ғазаб келтиради.

²⁴Кенг уйда уришқоқ хотин билан яшашдан кўра, чордоқда яшаган яхшироқ.

²⁵Узоқ юртдан келган хушхабар чарчаган одамга совуқ сув кабидир.

²⁶Фосиққа бош эгган солиҳ лойқаланган булоқ ва бузилган қудуқдайдир.

²⁷Кўп асал ейиш яхши эмас, иззатталаб бўлиш ҳам ҳурмат келтирмайди.

²⁸Ўзини тута олмайдиган одам деворсиз вайрона шаҳар кабидир.