Read Ўзбек тилидаги Муқаддас Китоб (ЎЗМК), 2013 Ҳикматлар 3 Bible Online

Ҳикматлар 3 - Ўзбек тилидаги Муқаддас Китоб (ЎЗМК), 2013 bible

Ҳикматлар 3

¹Ўғлим [1], сўзларимни унутма, амрларимни юрагингда сақла.

²Улар умрингга умр қўшади, ҳаётинг тинч бўлади.

³Абадий севгини асло тарк этма. Бўйнингга маржон қилиб тақиб ол, юрагинг қаърига ёзиб қўй.

⁴Шунда Худонинг ҳам, одамларнинг ҳам меҳрини қозонасан, Улардан иззат–ҳурмат топасан.

⁵Ўз ақл–идрокингга суянма, бутун қалбинг билан Эгамизга ишон.

⁶Ҳар ишингда Эгамизни эътироф эт, шунда У йўлларингни тўғрилайди [2].

⁷Ўзингни доно ҳисоблама. Эгамиздан қўрқ [3]. Ёмонликдан юз ўгиргин.

⁸Шундай қилсанг жисминг соғ, жонинг эса омон бўлади.

⁹Ўз бойлигинг, биринчи ҳосилинг билан Эгамизни улуғла.

¹⁰Шунда омборинг тўлиб–тошади, янги шаробинг етиб ортади.

¹¹Ўғлим, Эгамизнинг тарбиясини рад қилмагин, Унинг танбеҳидан руҳинг тушиб кетмасин.

¹²Ота яхши кўрган фарзандини [4] жазолагандек, Худо [5] ҳам севганини жазолайди [6].

¹³Доноликка эришган, ақл–идрок топган қандай бахтлидир!

¹⁴Чунки унинг нафи кумушдан, фойдаси эса олтиндан ҳам афзалроқдир.

¹⁵У жавоҳирлардан ҳам азиздир, сен тилаган бирор нарса Унга тенг келмайди.

¹⁶Унинг ўнг қўлида узоқ умр, чап қўлида эса бойлик ва шон–шуҳрат бор.

¹⁷Йўли — шодлик йўли, барча сўқмоқлари тинчдир.

¹⁸Донолик уни ушлаб турганлар учун ҳаёт дарахти кабидир, Уни асраганлар эса бахтлидир.

¹⁹Эгамиз донолик билан ерни яратди, ақл–идроки билан осмонни ўз ўрнига жойлаштирди.

²⁰Унинг ақли билан чуқурликлар бўлинган, булутлардан шудринг тушган.

²¹Ўғлим, донолик ва фаҳм–фаросатни маҳкам ушла, назарингдан қочирмагин.

²²Ўшанда улар жонингга ҳаёт бахш этади, бўйнингга безакдай бўлади.

²³Йўлингда эсон–омон юрасан, оёғинг эса қоқилмайди.

²⁴Бехавотир ётасан, уйқунг ширин бўлади.

²⁵Бехосдан келадиган офатдан қўрқма. Ёвуз ҳужум қилганда ҳам қўрқма.

²⁶Чунки Эгамиз ёнингда бўлади, сени қоқилишдан асрайди.

²⁷Яхшилик қилиш қўлингдан келса, муҳтожлардан ёрдамингни аяма.

²⁸Ўзингда бор бўлса, қўшнингга “кечроқ кел”, “эртага бераман”, деб айтма.

²⁹Сенга ишониб, ёнингда тинчгина яшаётган қўшнингга қарши ёмон ният қилма.

³⁰Сенга ёмонлик қилмаган одам билан сабабсиз уришма.

³¹Зўравонга ҳасад қилма, у қиладиган ишларни қилма.

³²Чунки Эгамизга ёвузлар жирканчдир, У тўғри одамга яқин бўлади.

³³Фосиқнинг уйи Эгамизнинг лаънатига, солиҳнинг уйи эса қут–баракага тўлади.

³⁴У мазах қилувчиларни мазах қилади, камтарга эса иноят қилади.

³⁵Донолар шон–шуҳратга эришадилар, нодонлар эса шармандаликка дучор бўладилар.