Read Ўзбек тилидаги Муқаддас Китоб (ЎЗМК), 2013 Ҳикматлар 31 Bible Online

Ҳикматлар 31 - Ўзбек тилидаги Муқаддас Китоб (ЎЗМК), 2013 bible

Ҳикматлар 31

¹Шоҳ Лемулнинг сўзлари. Бу сўзларни унга онаси ўргатган:

²“Ўғлим, нима десам экан? Нима дейин, эй, жигарбандим? Худодан тилаб олган ўғлим, сенга не айтай?

³Қувватингни хотинларга берма, шоҳни бузадиганларга ҳаётингни сарф қилма.

⁴Эй, Лемул, шоҳлар учун эмас шароб, май амалдорлар учун эмас!

⁵Улар ичиб қонунни унутади, эзилган халқнинг ҳукмида эгрилик қилади.

⁶Майни ҳалок бўлаётганга, шаробни эса қайғу чекканга бергин.

⁷Улар ичиб камбағаллигини унутсин, фалокатларини эсламасин.

⁸Оғзингни гунг учун очгин, бошига кулфат тушганларнинг тарафини олгин.

⁹Гапир, адолат билан ҳукм қил, бечора ва камбағалларни ҳимоя қил.”

¹⁰[1] Фаросатли хотинни ким топа олади? Унинг баҳоси гавҳардан ҳам баланд.

¹¹Эри унга юракдан ишонади, ҳеч нарсага муҳтож бўлмайди.

¹²У эрига ёмонлик эмас, бир умр яхшилик қилади.

¹³Жун ва сурп топади, хурсанд бўлиб ўз қўли билан ишлайди.

¹⁴Савдо кемалари каби узоқдан нонини келтиради.

¹⁵Қоронғуда ўрнидан туриб, уй аҳлини овқатлантиради, хизматкорларига топшириқ [2] беради.

¹⁶Ўйлаб дала сотиб олади, ўз қўли билан узумзор яратади.

¹⁷Белини маҳкам боғлаб, қўлларига қувват беради.

¹⁸Қилган ишининг роҳатини кўради, тунлари ҳам чироғи ўчмайди.

¹⁹Қўлини чархга қўяди, бармоқлари дукни тутади.

²⁰Камбағалларга қўлини узатади, муҳтожларга раҳм қилади.

²¹Уй аҳли учун қиш–қировдан қўрқмайди, чунки улар ҳаммаси қалин кийинтирилган.

²²Ўзи учун сўзана тикади, либоси эса кимхоб ва шойидандир.

²³Эри юрт оқсоқоллари орасида ўтиради, шаҳар дарвозасида [3] танилган.

²⁴Яна шойидан кийим тикиб сотади, савдогарларга белбоғ етказиб беради.

²⁵Либоси — қувват, шараф, у келажакка қараб қувонади.

²⁶Донолик билан сўзлайди, меҳр билан насиҳат қилади.

²⁷Уй аҳлига яхши қарайди, дангасалик қилмайди.

²⁸Болалари туриб дуо қилади, эри ҳам мақтайди.

²⁹“Фаросатли аёллар кўп, аммо сен ҳаммасидан аълосан.”

³⁰Жозиба алдамчи, чирой эса ўткинчидир, аммо Худодан қўрқадиган аёл кўкка кўтарилади.

³¹Меҳнатининг мевасини кўрсин, ишлари дарвозаларда уни шарафласин.