Read Ўзбек тилидаги Муқаддас Китоб (ЎЗМК), 2013 Ҳикматлар 6 Bible Online

Ҳикматлар 6 - Ўзбек тилидаги Муқаддас Китоб (ЎЗМК), 2013 bible

Ҳикматлар 6

¹Ўғлим [1], ўзгага кафиллик қилиб, бегона билан аҳдлашган бўлсанг [2],

²Ўз тилингдан илиниб, сўзларинг тузоққа етаклаган бўлса,

³ўғлим, ўзганинг қўлига тушиб қолибсан, ўзингни қутқар, бор, тиз чўкиб ёлвор.

⁴Кўзларингга на уйқу, на мизғиш бер.

⁵Овчидан қочган оҳу каби, беданавоз қўлидан қочган беданадай ўзингни қутқар.

⁶Эй, танбал, чумолиларга бир қара, уларнинг хатти–ҳаракатларини кўриб доно бўл.

⁷Уларнинг на раҳбари, на назоратчиси, на ҳукмдори бор.

⁸Лекин улар ёзда озиқ тўплайди, ўрим пайтида эса дон–дун йиғишади.

⁹Сен–чи, танбал, қачонгача ухлайсан?! Қачон ўрнингдан турасан?

¹⁰“Бироз ухлай, бир мизғиб олай, ёнбошлаб бирпас дам олай”, — дейсан.

¹¹Шунинг учун қашшоқлик йўлтўсардай, муҳтожлик эса қароқчидай устингга келади.

¹²Айёр ва нопоклар бузуқ сўзларни гапириб юрадилар.

¹³Кўз қисадилар, оёқ–қўллари билан имо–ишора қиладилар.

¹⁴Юракларида доим ёвуз ният қилиб, одамлар орасида жанжал чиқарадилар.

¹⁵Шунинг учун тўсатдан офатга учрайдилар, шифо топмай тўсатдан ҳалок бўладилар.

¹⁶Олти нарса Эгамизга нафратли, етти нарса жирканчдир. Булар:

¹⁷манманлик нигоҳи, ёлғончи тил, бегуноҳ қонни тўкадиган қўллар,

¹⁸ёмон ниятли юрак, ёвузликка югурадиган оёқлар,

¹⁹ёлғон гапирадиган сохта гувоҳ, ака–укалар орасига нифоқ солувчилардир.

²⁰Ўғлим, отанг насиҳатларига қулоқ сол, онанг ўгитларини рад этма,

²¹уларни доим юрагингда сақла, бўйнингга тақиб ол.

²²Юрганингда сенга йўл кўрсатади, ухлаганингда қўриқлайди, уйғоқлигингда сенга гапиради.

²³Чунки амрлар — чироқ, танбеҳ — ҳаёт йўли, панд–насиҳатлар эса нурдир.

²⁴Улар сени бошқаларнинг хотинидан, зинокор аёлнинг ширин сўзидан сақлайди.

²⁵Юрагингда унинг гўзаллигини орзу қилмагин, кўзларига маҳлиё бўлма.

²⁶Фоҳишага биттагина нон ҳақи етарли, аммо зино қилувчи бутун ҳаётингни олади.

²⁷Кийимларни куйдирмасдан қўйинга чўғ солиб бўладими?!

²⁸Оёқни куйдирмасдан чўғ устида юриб бўладими?!

²⁹Ўзганинг хотини олдига кирганнинг аҳволи ҳам шундай, бегона аёлга теккан жазосиз қолмайди.

³⁰Қорни очлигидан ўзини тўйдириш учун ўғирлик қилса, одамлар ундан нафратланмайди.

³¹Лекин қўлга тушиб қолганда ўғирланган молининг ҳақини етти баробар қилиб қайтариши керак.

³²Зино қилган ақлсиздир, ўзини ўзи нобуд қилади.

³³У кўп калтак еб шарманда бўлади, бир умрга бадном бўлади.

³⁴Чунки рашк эрни ғазаблантиради, эр қасос олганда шафқат қилмайди.

³⁵Ҳар қандай ҳадяни рад этади, қанча пора берсанг олмайди.