Read Ўзбек тилидаги Муқаддас Китоб (ЎЗМК), 2013 Ҳикматлар 8 Bible Online

Ҳикматлар 8 - Ўзбек тилидаги Муқаддас Китоб (ЎЗМК), 2013 bible

Ҳикматлар 8

¹Донолик [1] чорламайдими?! Идрок овозини баланд қилиб чақирмайдими?!

²Қир–адирларда, йўл бўйларида, чорраҳаларда,

³шаҳар дарвозаларида [2], эшиклар олдида туриб жар солади:

⁴“Эй, инсонлар, сизларни чақиряпман, одамзодга гапирмоқдаман.

⁵Соддалар [3], фаҳм–фаросатли бўлинг, сиз, нодонлар, эса идрокли.

⁶Қулоқ солинг, мен аъло гапларни гапираман, ростини айтаман.

⁷Чунки тилим ҳақиқатни гапиради, фосиқликдан эса нафратланади.

⁸Ҳамма сўзларим тўғридир, уларда на эгрилик, на бузуқлик бор.

⁹Фаросатлиларга равшан, билим оладиганларга эса тўғридир.

¹⁰Кумуш ўрнига насиҳатларимни, олтин ўрнига эса илм–маърифатни танланг.

¹¹Чунки донолик қўҳинурдан аълороқдир, ҳеч қандай шодлик У билан тенглаша олмайди.

¹²Мен, Донолик [4], ақл–идрок билан яшайман, билим ва фаҳм–фаросат мендадир.

¹³Эгамиздан қўрқиш [5] ёмонликдан нафратланиш демакдир. Мен мағрурлик ва манманликдан, ёвузлик ва бузуқ тилдан нафратланаман.

¹⁴Менда маслаҳат ва ҳақиқат бор, Мен идрокман, қуввату куч ҳам Мендадир.

¹⁵Шоҳлар мен орқали ҳукм сурадилар, ҳукмдорлар тўғри қонунлар чиқарадилар.

¹⁶Мен орқали раҳбарлар бошқарадилар, амалдор ва барча одил ҳакамлар ҳукм чиқарадилар.

¹⁷Ким Мени севса ўшани севаман, астойдил излаганлар Мени топадилар.

¹⁸Бойлик, шуҳрат, битмас–туганмас хазина, фаровонлик Мендадир.

¹⁹Менинг ҳосилим тоза олтиндан ҳам, танланган кумушдан ҳам яхшироқ.

²⁰Мен тўғри йўлдан, адолат сўқмоқларидан юраман.

²¹Мени севганлар бойликни мерос қилиб оладилар, уларнинг хазинасини тўлдираман.

²²Эгамиз ишини бошламасидан олдин, Ўз ишларининг бошида Менга эга эди.

²³Қадимдаёқ, энг бошида, дунё яратилмасдан олдин, Мен тайинланган эдим.

²⁴Тубсиз денгизу, бепоён уммон, ё бирорта булоқ кўз очмай туриб, Мен дунёга келтирилганман.

²⁵Тоғу тош, қир–адир барпо бўлмасдан олдин Мен таваллуд топганман.

²⁶У ҳали на ер, на далаларни, на ернинг тупроғини яратган эди.

²⁷Худо осмонни яратганда, бепоён уммон узра фалакни барпо этганда, Мен ўша ерда эдим.

²⁸Осмонга булутларни жойлаб, денгизларни сув билан тўлдирган чоғда,

²⁹У сув тошиб кетмасин деб амр берганда, ерга асос солганда [6],

³⁰Мен унинг ёнида мусаввир эдим, қошида кундан–кунга завқланиб, доимо қувонардим.

³¹Дунёда, Унинг ерида одамзод билан хурсанд бўлардим.

³²Ўғилларим, менга қулоқ солинглар, йўлимдан юрганлар бахтлидир.

³³Панд–насиҳатларимни тинглаб доно бўлинглар, уни рад этманглар.

³⁴Ҳар кун остонамда кутиб, эшигимни пойлаб, сўзларимга қулоқ соладиган бахтлидир.

³⁵Чунки Мени топган ҳаёт топади, Эгамизнинг марҳаматига сазовор бўлади.

³⁶Кўздан йўқотган ўзига зарар етказади, Мендан нафратланган ўлимни севади.”