Read Ўзбек тилидаги Муқаддас Китоб (ЎЗМК), 2013 Воиз 10 Bible Online

Воиз 10 - Ўзбек тилидаги Муқаддас Китоб (ЎЗМК), 2013 bible

Воиз 10

¹Ўлик пашшалар хушбўй мойни саситиб юборади, шунингдек, озгина аҳмоқлик кўп доноликдан оғирроқ чиқади.

²Дононинг юраги ўнгга — тўғри ишларни қилишга, нодонники эса чапга — фосиқликка тортади.

³Аҳмоқларнинг ақли етмай, қилган қилиқлари билан ҳам ҳаммага аҳмоқлигини кўрсатади.

⁴Агар ҳукмдорнинг сендан жаҳли чиқса, жойингни ташлаб кетмагин, чунки вазминлик туфайли хафагарчиликлар ҳам босилиб кетади.

⁵Мана мен бу дунёда кўрган фожиа, ҳукмдордан бошланган катта хато:

⁶аҳмоқлар баланд лавозимга кўтарилади, бойлар эса пастда ўтиришади.

⁷Мен яна шуни кўрдим: зодагонлар худди қуллардай пиёда юрганда, қуллар отда юрарди.

⁸Чуқур қазиганнинг ўзи унга тушиши, деворни бузганни эса илон чақиши мумкин.

⁹Тош кесган ўзига зарар етказиши, хода ёрган эса оғриққа дучор бўлиши мумкин.

¹⁰Агар болта ўтмас бўлса–ю, уни ўткирламасанг, уни ишлатиш учун кўпроқ куч керак бўлади. Мана, доноликдан қандай фойда бор экан.

¹¹Аммо илон ўйнатилмасдан олдин чақиб олса, илон ўйнатувчига донишмандликнинг нима фойдаси бор?!

¹²Доноларнинг сўзлари уларга ҳурмат келтиради, нодонларнинг сўзлари эса ўзларини ҳалок қилади.

¹³Уларнинг сўзлари аҳмоқлик билан бошланиб, ғирт телбалик билан тугайди,

¹⁴шунда ҳам аҳмоқлар гапираверадилар. Ҳеч ким нима бўлишини билмайди, ким бизга келажакни айтиб бера олади?!

¹⁵Нодоннинг ҳаракатлари уни жуда чарчатади, чунки у шунчалик аҳмоқки, шаҳарга борадиган йўлни ҳам қайта топа олмайди.

¹⁶Эй, шоҳи ёш бўлган, ҳукмдорлари эрталабдан зиёфат қиладиган юрт, сенга афсус–надоматлар бўлсин.

¹⁷Шоҳи асилзода бўлган, ҳукмдорлари мастлик учун эмас, куч тўплаш учун ўз вақтида зиёфат қиладиган юрт бахтлидир.

¹⁸Дангасаликдан уйнинг томи чўкади, Ялқовлик туфайли томдан чакки ўтади.

¹⁹Зиёфат берилганда кўнгил шодликка тўлади, Шароб инсонни хушнуд этади. Лекин иккаласи учун ҳам пул керак.

²⁰Ҳатто сирдош дўстларинг орасида ҳам шоҳни лаънатлама, ўз ётоқхонангда ҳам бойларни ёмонлама. Яхши гапнинг ҳам, ёмон гапнинг ҳам қаноти бордир. Осмондаги қуш сўзларингни етказиб бориши мумкин.