Read Ўзбек тилидаги Муқаддас Китоб (ЎЗМК), 2013 Воиз 11 Bible Online

Воиз 11 - Ўзбек тилидаги Муқаддас Китоб (ЎЗМК), 2013 bible

Воиз 11

¹Нонингни сувга ташла, бир неча кундан кейин уни яна топасан.

²Бу дунёда қандай кулфат келишини билмайсан, шунинг учун нарсаларингни етти, ҳатто саккиз кишига бўлиб бергин [1].

³Булутлар тўлганда, ерга ёмғир ёғади, дарахт шимол томонга ёки жануб томонга йиқилса ҳам, ўша йиқилган жойида ётаверади.

⁴Шамолни кўриб қўрққан ҳеч қачон уруғ экмайди, ёмғирдан хавфсираб, булутни кузатган ҳеч қачон ҳосил ўрмайди.

⁵Онанинг бачадонидаги болага қандай қилиб жон [2] киришини билмаганингдек, ҳамма нарсани содир қиладиган Худонинг ишларини билмайсан.

⁶Уруғларингни эрталаб эккин, кечқурун ҳам қўлларинг бўш ўтирмасин, чунки сен қайси бири — унисими ёки бунисими яхши ўсишини билмайсан, балки иккаласи ҳам яхши ўсар.

⁷Ёруғлик лаззатлидир, қуёшни кўриш кўзлар учун ҳам ёқимлидир.

⁸Узоқ йиллар яшайдиганлар ҳам ҳар бир яшаган кунларидан завқ олсин, ҳали кўп қоронғилик кунлари бўлишини эсда тутсин. Ҳамма келадиган нарсалар елдай ўтиб кетади [3].

⁹Эй, йигит, ёшлигингда роҳатлан, юрагинг сени завқлантирсин. Кўнглинг орзу қилган, кўзларинг хоҳлаган ишни қилгин, лекин билиб қўй, ҳар бир қилган ишинг учун Худо сени ҳукм қилади.

¹⁰Қайғурмагин, тананг оғриқни билмасин, чунки ёшлик, ҳаёт тонги елдай тез ўтиб кетади.