Read Ўзбек тилидаги Муқаддас Китоб (ЎЗМК), 2013 Қўшиқ 1 Bible Online

Қўшиқ 1 - Ўзбек тилидаги Муқаддас Китоб (ЎЗМК), 2013 bible

Қўшиқ 1

¹Сулаймоннинг энг гўзал қўшиғи. Ўпгин мени лабларинг билан, Сенинг севгинг шаробдан ҳам ширинроқдир.

²Атир мойларинг қанчалик хушбўй! Ёқимли атир каби номинг ҳар тарафга таралар. Шунинг учун қизлар сени севарлар.

³Мени ўзинг билан олиб кет, тезроқ борайлик. Эй шоҳим, мени ўз ётоғингга олиб киргин. Эй шоҳимиз, биз қувонамиз. Сиз билан севинамиз, Шаробдан ҳам кўпроқ сизнинг севгингизни мақтаймиз. Эй севгилим! Қизлар сени севиб, тўғри қилишади.

⁴Эй Қуддус қизлари! Мен қорачадан келган бўлсам ҳам гўзалман, Кедар чодирларидай қора бўлсам ҳам, Сулаймон пардаларидай чиройлидирман.

⁵Қоралигим учун менга паст назар билан қараманглар. Қуёш нурлари мени қорайтирди. Ака–укаларимнинг мендан жаҳли чиқиб, Мени узумзорлар қоровули қилиб қўйишди, Аммо ўз узумзоримга қарай олмадим!

⁶Севгилим, менга айтгин–чи, Қаерда ўз подангни боқасан? Туш вақти уларни қаерга ётқизасан? Айт менга, яна подачи дўстларинг олдида Уятсиз аёллардай бўлиб юрмай ахир.

⁷Қаердалигимни билмасанг, Эй гўзалларнинг гўзали, Поданинг изларидан боргин. Чўпонларнинг чодирлари олдида Ўз эчкиларингни ўтлатгин.

⁸Эй севгилим, Сен фиръавн аравасига қўшилган учқур отдай гўзалсан.

⁹Зиракларинг туфайли ёноқларинг гўзалдир, Марваридлар бўйнингни қандай чиройли қилар.

¹⁰Сенга атаб тилладан безаклар, Кумушдан тақинчоқлар ясаттираман.

¹¹Шоҳим ёнбошлаб ётганда, Атирларим ўз ҳидини таратди.

¹²Кўкракларим орасида ётган, Хушбўй миррага тўла халтача кабидир менинг севгилим.

¹³У мен учун Энгеди боғларидаги Хина гулларидайдир.

¹⁴Гўзалдирсан, эй севгилим, Сен гўзалсан! Кўзларинг кабутар кўзларидай назокатлидир.

¹⁵Чиройлисан, эй севгилим, Жуда ҳам хушрўйдирсан, Ям–яшил майсалар бизнинг тўшагимиздир.

¹⁶Садр дарахтлари томимиз бўлса, Арчалар томимиз синчларидир.