Read Ўзбек тилидаги Муқаддас Китоб (ЎЗМК), 2013 Қўшиқ 2 Bible Online

Қўшиқ 2 - Ўзбек тилидаги Муқаддас Китоб (ЎЗМК), 2013 bible

Қўшиқ 2

¹Мен Шарон атиргулиман, Водийлар нилуфаридирман.

²Менинг севгилим қизлар орасида, Тиканлар орасидаги нилуфар гулидайдир!

³Менинг севгилим йигитлар орасида, Ўрмон дарахтлари орасидаги олма дарахтидай ажралиб турар. Мен унинг соясида ўтириб завқ оламан, Унинг меваси жуда шириндир.

⁴У мени ўз меҳмонхонасига олиб кирди, Мени ўз севгиси билан қоплади.

⁵Майизлар едириб, менга куч бергин, Олмалар билан қувватга тўлдиргин, Ахир, севгилимнинг ишқи дардида ёнмоқдаман.

⁶Унинг чап қўли бошим остидадир, Ўнг қўли билан эса мени қучоқлайди!

⁷Эй Қуддус қизлари, Кийигу ёввойи оҳулар ҳақи онт ичинг. Вақт–соати келмагунча, Севгини қўзғатманг, уйғотманг.

⁸Севгилим овози эшитиляпти, Ана қаранглар, у келяпти. Тоғлару қирлар оша келяпти.

⁹Севгилим оҳудай, ёш кийикдайдир. Мана, у девор ортида турибди. Ойналардан мўралаб, Панжаралар орасидан қараб турибди.

¹⁰Севгилим менга шундай дейди: “Тура қол, севгилим, оппоғим, Мен билан юргин.

¹¹Мана қиш ўтди, ёмғирлар тўхтади.

¹²Ер юзи гуллар билан қопланмоқда, Юрт бўйлаб кабутарлар куйи эшитилмоқда, Қўшиқ куйлаш вақти етиб келди.

¹³Анжир мева тугишни бошлади, Токлар ҳам гулга кирди. Улар хушбўй ҳидларини таратмоқда. Тура қол, севгилим, оппоғим, Мен билан юргин.”

¹⁴Севгилим, сен тоғларда яшайдиган, Қояларда яширинадиган кабутардайсан. Юзингни кўрсатгин, овозингни эшитай. Овозинг жуда ширин, юзинг гўзалдир.

¹⁵Қаранг, узумзоримиз гуллаб ётибди, Кичкина тулкиларни ушланглар. Ахир, улар узумзорларни вайрон қилади.

¹⁶Севгилим меникидир, мен эса уникиман, У нилуфарлар териб, ўз боғидан завқ олади.

¹⁷Тонг отмай туриб, борақол жоним. Баланд тоғларда сакрайдиган оҳу, кийикдай бўлиб, Қоронғулик чекинмасдан олдин, қайтиб кета қол.