Read Ўзбек тилидаги Муқаддас Китоб (ЎЗМК), 2013 Қўшиқ 5 Bible Online

Қўшиқ 5 - Ўзбек тилидаги Муқаддас Китоб (ЎЗМК), 2013 bible

Қўшиқ 5

¹Эй жоним, келинчагим, боғимга келиб, Мирра ва зираворларимни тўплайман. Асалари мумини ҳамда асалимни ейман, Сут ва шаробимни ичаман. Тўйгунингча егин, севгилим, Севгидан ичиб, қониққин.

²Ухладим, лекин юрагим уйғоқ эди. Ана, севгилим чақирмоқда: “Очгин эшигингни, жоним, севгилим, Кабутарим, комилим. Бошим ҳўлдир шудрингдан, Сочларим эса тун шабнамидан.”

³Кийимларимни ечиб қўйганман, Қандай қилиб яна кияман?! Оёқларим ювилган, Уларни кир қилайми?!

⁴Севгилим қўлини эшик тешигидан киргизганда, Бутун вужудим титраб кетди.

⁵Севгилимни кирғизай, дея турдим. Қўлларимдаги мирра, Эшикнинг тутқичларига оқиб тушди.

⁶Севгилимга эшикни очдим, Лекин у кетиб қолибди. У кетганига юрак–бағрим эзилди. Қидириб, уни топа олмадим, Чақирдим, лекин у жавоб бермади.

⁷Шаҳарни айланиб юрган қўриқчилар Мени кўриб қолдилар. Улар мени уриб яраладилар. Ўша шаҳар қўриқчилари Устимдаги рўмолимни олиб қўйдилар.

⁸Эй Қуддус қизлари, ваъда беринглар, Севгилимни топсангиз, айтиб қўйинглар, Унинг ишқи дардида ёнмоқдаман.

⁹Эй аёллар гўзали, Севгилингнинг бошқалардан нимаси ортиқ?! Унинг бошқалардан нимаси ортиқки, Сен бизга, ваъда беринглар, деб айтасан?!

¹⁰Севгилим қўҳлик, чиройлидир, Ўн мингтанинг ичида ажралиб турар.

¹¹Боши энг аъло тилладай гўзал, Жингалак сочлари қарғадай қоп–қорадир.

¹²Кўзлари эса булоқлар бўйидаги кабутарлардай, Чашмалар бўйидаги, сутга чўмдирилган каптарлардайдир.

¹³Унинг ёноқлари муаттар ҳидли Зиравор боғлари каби жуда хушбўйдир. Лаблари эса мирра оқиб турган Нилуфарлар каби шириндир.

¹⁴Қўллари тилладан ясалиб, Топаз тошлар билан безатилганга ўхшайди. Танаси эса зангори ёқутлар ўрнатилган Теп–текис фил тишидай чиройлидир.

¹⁵Оёқлари тилла тагликка ўрнатилган Мармар устунлари каби кучлидир. Унинг қиёфаси улуғвор Лубнондай, Қудратли аъло садр дарахтларидайдир.

¹⁶Унинг овози жуда ширин, Ўзи эса ҳар жиҳатдан мафтункор. Эй Қуддус қизлари, мана шундай йигит Менинг севгилим, дўстимдир.