Read Ўзбек тилидаги Муқаддас Китоб (ЎЗМК), 2013 Қўшиқ 6 Bible Online

Қўшиқ 6 - Ўзбек тилидаги Муқаддас Китоб (ЎЗМК), 2013 bible

Қўшиқ 6

¹Севгилинг қаерга кетди, Эй гўзалларнинг гўзали? Айт–чи, қайси томонга йўл олди, Биз сен билан уни қидирайлик.

²Севгилим ўз боғига, Хушбўй зираворлар боғига келди. У нилуфар гуллар териб, Ўз боғидан завқ олгани келди.

³Мен севгилимники, севгилим эса меникидир! У нилуфарлар териб, ўз боғидан завқ олади.

⁴Сен Тирза шаҳридай гўзалдирсан, севгилим, Қуддус шаҳридай хушрўйдирсан, Байроқлари кўтарилган қўшиндай савлатлисан.

⁵Кўзларингни олиб қоч мендан, Улар мени мафтун қилганлар. Гилад қирларидан ёйилиб тушаётган Қоп–қора қўйлардайдир сенинг сочларинг.

⁶Ювиб–таралган оппоқ Эчкилардайдир сенинг тишларинг. Ҳар бирининг эгизи бор, Ўрни ҳеч бўш қолмаган.

⁷Чачвонинг ортидаги ёноқларинг эса Анорлардай қип–қизил.

⁸Ана, олтмишта малика, саксонта канизак, Сон–саноқсиз қизлар!

⁹Аммо менинг кабутарим, Комил севгилим ўзгачадир. Онасининг эркаси, Туққан онасининг ягонасидир. Қизлар уни кўриб, у бахтлидир, дейишади, Маликаю канизаклар уни кўриб, мақташади.

¹⁰Маҳбубамнинг нигоҳлари тонгдайдир. Ўзи эса тўлин ойдай гўзал, қуёшдай ёрқин, Байроқлари кўтарилган қўшиндай савлатлидир.

¹¹Мен бодомзорга, Водий чечакларини кўришга бордим. Токлару анорлар гуллаганмикин, дея бордим.

¹²Шоҳона аравада ўтиргандай, Ҳаяжондан титрар эдим.