Read Ўзбек тилидаги Муқаддас Китоб (ЎЗМК), 2013 Ишаё 18 Bible Online

Ишаё 18 - Ўзбек тилидаги Муқаддас Китоб (ЎЗМК), 2013 bible

Ишаё 18

¹Ҳолингга вой! Эй Ҳабашистон [1] дарёлари ортидаги Қанотлар гувиллашига тўлган юрт! [2]

²Нил дарёси орқали хабарчиларини жўнатадиган, Денгиз орқали папирус кемаларини юборадиган юрт! Сенинг ҳолингга вой! Боринглар, эй чаққон хабарчилар, Баланд бўйли, тиниқ терили халққа, Узоқдан ҳам, яқиндан ҳам қўрқинчли бўлган халққа, Кучли, забт этувчи халққа, Юртида дарёлари бор халққа.

³Эй олам аҳли, юрт халқи! Тоғларда байроқ кўтарилганда, кўрасиз, Бурғу чалинганда, эшитасиз.

⁴Мана, Эгам менга шундай демоқда: “Қоқ тушда куйдирай, деган ёрқин қуёш нури каби, Ҳосил мавсумида осмонни босай, деган қора булут каби Энди жим бўлиб, Ўз масканимдан кузатиб тураман.”

⁵Ҳосил йиғилмасдан олдин, ғунча очилганда, Узум пишиб етилай деганда Эгам новдаларни ток қайчи ила кесади, Куртакларни эса узиб ташлайди.

⁶Уларнинг ҳаммаси қолиб кетади Тоғлардаги йиртқич қушларга, Даштдаги ёввойи ҳайвонларга. Улар ем бўлади ёзда йиртқич қушларга, Қишда ёввойи ҳайвонларга.

⁷Ўша пайтда ҳадялар келтирар Сарвари Оламга Баланд бўйли, тиниқ терили Ҳабаш халқи, Узоқдагилар ҳам, яқиндагилар ҳам қўрқадиган халқ, Кучли, забт этувчи халқ, Юртида дарёлари бўлган халқ. Ҳа, бу халқ ҳадялар келтирар Сион тоғига Сарвари Оламга аталган жойга.