Read Ўзбек тилидаги Муқаддас Китоб (ЎЗМК), 2013 Ишаё 21 Bible Online

Ишаё 21 - Ўзбек тилидаги Муқаддас Китоб (ЎЗМК), 2013 bible

Ишаё 21

¹Денгиз бўйидаги саҳро [1] ҳақида башорат. Нагав узра кетма–кет эсаётган бўронлар каби, Чўл — қўрқинчли юртдан келаётир у.

²Оғир бир ваҳий кўрдим: Хоин хоинлик қилаётир, Босқинчи талон–тарож қилаётир. Эгамнинг сўзларини эшитдим: “Эй Элам халқи, ҳужум қил, Эй Мидия [2] халқи, қамал қил! Жамики нолаларга барҳам бераман!”

³Эвоҳ, кўрганларимдан ичимда оғриқ турди, Туғаётган аёл каби азоблар мени қамради. Икки букилдим эшитганларимдан, Даҳшатга тушдим кўрганларимдан.

⁴Юрагим увишиб кетди, Қўрқувдан титраб кетдим. Оқшомни кутгандим, У эса қўрқувга тўла.

⁵Дастурхон ҳозирламоқдалар, Гиламлар тўшаб, еб–ичмоқдалар. Қўзғалинг, эй раҳнамолар, қалқонларни ёғланг!

⁶Раббий менга шундай деди: “Қани, бир қоровул қўй, Кўрганини етказсин.

⁷Жанг араваларининг, отлиқларнинг, Эшакларга, туяларга минганларнинг Жуфт–жуфт бўлиб келганини кўради. Яхшилаб эътибор берсин.”

⁸Шу лаҳзада қоровул шердай ўкириб қолди [3]: “Эй тўрам, мен кундузи ҳар доим Қоровул минорасида тураман, Ҳар тун ҳам жойимдаман.

⁹Ана, жанг аравалари, отлиқлар Жуфт–жуфт бўлиб келаётир!” Шу он у бақириб хабар берди: “Қулади, Бобил қулади! [4] Бутлари синиб, ер билан битта бўлди!”

¹⁰Эҳ, халқим! Хирмонда буғдой каби янчилган [5] халқим! Исроил халқининг Худоси — Сарвари Оламдан Эшитганларимни сизга билдирдим.

¹¹Думах [6] ҳақида башорат. Сеирдан [7] мени чақиришар: “Эй посбон, қачон тонг отар? Қачон тонг отар?”

¹²Жавобим шудир: “Тонг отаётир, Аммо яна кеч киради. Кўпроқ билмоқчи бўлсангиз, Яна қайтиб келинг.”

¹³Арабистон ҳақида башорат. Ғарб ўрмонларида тунайсиз, Эй Дедон [8] карвонлари!

¹⁴Эй Темо [9] аҳолиси! Сув келтиринг, ташналарга пешвоз чиқинг! Қутулиб омон қолганларга нон беринг!

¹⁵Ахир, улар қочаётирлар қиличдан, Яланғочланган қиличдан, Таранг тортилган ёйлардан, Шафқатсиз урушлардан.

¹⁶Раббий менга шундай деди: “Яна бир йилдан кейин, ёлланган ишчининг муддати каби Кедарнинг [10] улуғворлиги барҳам топади.

¹⁷Кедарнинг камонкашу ёйандозларидан озгинаси қолади.” Ҳа, Исроил халқининг Худоси — Эгамиз шундай деди.