Read Ўзбек тилидаги Муқаддас Китоб (ЎЗМК), 2013 Ишаё 23 Bible Online

Ишаё 23 - Ўзбек тилидаги Муқаддас Китоб (ЎЗМК), 2013 bible

Ишаё 23

¹Тир [1] ҳақида башорат. Эй Таршиш [2] кемалари, фарёд қилинг! Энди йўқ бошпанангиз! Кипр [3] соҳилида эшитган хабарлар. Мана, уларнинг ҳаммаси равшан.

²Сукут сақланг, эй орол халқи! Эй Сидон [4] савдогарлари! Бир пайтлар кемаларга тўла эдингиз.

³Шихор [5] дони, Нилнинг ҳосили Тирнинг даромади бўлган эди, У элатлардан фойда қиларди.

⁴Уят сенга, эй Сидон! Ахир, Тир, денгиз бўйидаги қалъа шундай демоқда: “На тўлғоқ азобин чекдим, на туғдим, На ўғиллар, на қизлар улғайтирдим.”

⁵Тир тўғрисида эшитганда, Мисрнинг юраги қинидан чиқай дейди.

⁶Таршишга жўнанг, эй қирғоқ аҳолиси, Фарёд қилинг!

⁷Қадимда барпо бўлган, Такаббур шаҳрингизнинг ҳоли не бўлди? Энди дарбадар бўласиз, Узоқ, бегона юртни ватан қиласиз.

⁸Тирга қарши ким бундай қарор чиқарди? Бу шаҳар шоҳларга тож кийдирганди, Савдогарлари ҳукмдор эди, Бутун дунё уларни иззат қиларди.

⁹Сарвари Олам қабул қилди бу қарорни: “Такаббурлиги, улуғворлиги йўқ бўлсин, Бутун олам иззат қилганлар ерга урилсин.”

¹⁰Эй Таршиш аҳли! Нил бўйидаги деҳқонлар каби Ерларингга ишлов бер [6]. Ахир, бандаргоҳинг йўқ энди [7].

¹¹“Канъон қалъалари вайрон бўлсин”, деб Эгамиз амр берди. Ҳа, У денгизга қарши қўл кўтарди, Шоҳликларни титратди.

¹²Эгамиз шундай деди: “Зулм чеккан, эй Сидон аҳли, Энди хурсандчилик билмай ўтасан. Қани, Кипрга жўна, У ерда роҳат нималигин билмай ўтасан.”

¹³Ана Бобил [8] юртига боқ, энди унинг халқи йўқ. Оссурияликлар қуршов миноралари қурдилар, Бобилликларнинг саройларини яксон қилдилар. Юртни вайронага айлантирдилар, ёввойи ҳайвонларга бердилар.

¹⁴Фарёд қилинг, эй Таршиш кемалари, Энди йўқ бошпанангиз! [9]

¹⁵Шундан кейин Тир шаҳри бир шоҳнинг умрича — етмиш йилга унутилади. Етмиш йил ўтгандан кейин, Тир ҳам қуйидаги қўшиқда айтилган фоҳишадай бўлади.

¹⁶Арфангни ол, шаҳар бўйлаб кез, Эй ҳамма унутган фоҳиша! Қани, гўзал қилиб чал–чи! Қўшиқ кетидан қўшиқ куйла–чи! Балки сени эслаб қоларлар.

¹⁷Етмиш йил ўтгач, Эгамиз Тир билан яна алоқада бўлади. Аммо Тир пул учун яна фоҳишалик қила бошлайди. Дунёнинг ҳамма шоҳликларига фоҳиша бўлади.

¹⁸Шаҳар тижоратдан ва фаҳшдан олган даромадларини Эгамизга атайди. Даромадлар йиғилмайди ҳам, сақланмайди ҳам. Тижоратдан олганларини тўйгунча есинлар, чиройли кийинсинлар, деб даромад Эгамизнинг ҳузурида яшаётганларга берилади.