Read Ўзбек тилидаги Муқаддас Китоб (ЎЗМК), 2013 Ишаё 27 Bible Online

Ишаё 27 - Ўзбек тилидаги Муқаддас Китоб (ЎЗМК), 2013 bible

Ишаё 27

¹Ўша куни Эгамиз қиличи билан жазолар, Шафқатсиз, баҳайбат, қудратли қиличи билан. Жазолар Левитанни [1], ўша қочаётган илонни, Левитанни, ҳа, ғимирлаётган илонни, Ўлдирар денгиздаги ўша аждарҳони.

²Эгам айтар: “Ўша куни ажойиб узумзор [2] тўғрисида куйланг!

³Мен, Эгангиз, узумзор қўриқчисиман, Доимо уни суғораман. Кечаю кундуз узумзорни қўриқлайман, Ҳеч ким унга зарар келтиролмайди.

⁴Мен ғазабда эмасман! Лекин тиканлару буталар Менга қарши чиқса, Улар билан жанг қиламан. Уларни ёндириб ташлайман.

⁵Улар Мендан паноҳ излаб келсин! Ҳа, Мен билан тинчлик ўрнатсин, Улар Мен билан тинчлик ўрнатсин.”

⁶Вақти келиб, Ёқуб насли илдиз отади, Исроил куртак отиб, гуллайди, Ер юзини мевалари билан тўлдиради.

⁷Исроилнинг душманларини Эгамиз эзди! Эгамиз Исроилни шунчалик урдими?! Исроилнинг ғанимларини ўлдирди! Эгамиз Исроилни шунчалик жазоладими?!

⁸Йўқ, Эгамиз ўз халқини жазолаганда Уларни юртидан ҳайдаб, сургун қилди. Шарқдан эсган бўрон каби Уларни узоққа олиб кетди.

⁹Шундай қилиб, Ёқуб наслининг гуноҳлари Тамомила унутилади. Эгамиз шу ишни қилади. Қурбонгоҳнинг тошлари парчаланса Исроил кечирилади. Тикка турган Ашерага [3] аталган устуну Тутатқи қурбонгоҳи қолмаса, Исроилнинг гуноҳлари ювилади.

¹⁰Мана, Исроилнинг мустаҳкам шаҳарлари ташландиқ бўлди, Тарк этилган саҳродай, ҳувиллаган юрт бўлди. Вайроналар орасида чорва ўтлаб юради, Дарахтларнинг баргини еб, шип–шийдам қилади.

¹¹Шохлари қуриб, синиб ётибди, Аёллар келиб, уларни ёқади. Бу халқ ақл–ҳушидан айрилган, Яратган ҳам уларга ачинмайди, Худо уларга марҳамат кўрсатмайди.

¹²Ўша куни, эй Исроил халқи, Эгамиз сизларни Фурот дарёсидан Миср сойлигигача бўлган ерда янчади [4]. Ҳаммангизни битта–битта йиғиб келади.

¹³Ўша куни катта карнай чалинади. Оссурия юртида йўқолганлар, Миср юртига қувилганлар келиб, Қуддусдаги муқаддас тоғда [5] Эгамизга сажда қилади.