Read Ўзбек тилидаги Муқаддас Китоб (ЎЗМК), 2013 Ишаё 45 Bible Online

Ишаё 45 - Ўзбек тилидаги Муқаддас Китоб (ЎЗМК), 2013 bible

Ишаё 45

¹Эгам айтар: “Мен шоҳ Курушнинг [1] ўнг қўлини кучайтирдим. Халқларни унга итоат эттирай, дея Шоҳларни қуролсизлантираман. Унинг олдида эшиклар очиқ туради, Дарвозалар ёпилмайди.” Эгамиз Ўзининг танлагани — Курушга шундай айтмоқда:

²“Мен Ўзим Сенинг олдингда бораман, Тоғларни [2] текисликка айлантираман, Бронза эшикларни парчалайман, Темир тамбаларни синдираман.

³Мен Эганг эканлигимни билиб олгин, Сенинг исмингни айтиб чақираётган Мен Исроил халқининг Худоси эканлигимни англагин, деб Яшириб қўйилган бойликларни, Зулматдаги хазинани сенга бераман.

⁴Қулим Ёқуб ҳақи, Ўзим танлаган Исроил ҳақи, Сенинг исмингни айтиб чақирдим. Сенга ном ато қилдим, Аммо сен Мени билмайсан.

⁵Мен Эгангман, бошқаси йўқ, Мендан бошқа худолар йўқ! Сенга мадад бераман, Аммо Мени билмайсан.

⁶Мендан бошқа бири йўқлигини Шарқу ғарбда ҳамма билсин, дедим. Мен Эгангман, бошқаси йўқ!

⁷Мен ёруғлик яратаман, зулмат бино қиламан, Фаровонлик юбораман, кулфат ёғдираман. Мен Эгангман! Буларнинг ҳаммасини Мен қиламан!

⁸Эй самолар, юқоридан солиҳлик ёғдиринг, Ҳа, солиҳлик булутлардан қуйилсин. Ер очилиб, нажот келиб чиқсин, Солиҳлик билан бирга яшнасин. Мен Эгангизман! Мен уни яратганман.”

⁹Ҳолингизга вой! Эй Яратувчи билан баҳслашадиганлар! Тупроқдан ясалган кўзаю хумлар! Ахир, лой кулолга: “Нима қиляпсан?” дейдими?! “Ясаётган нарсангнинг қўллари йўқ–ку!” деб айтадими?!

¹⁰Эй отасига: “Нимага туғдиряпсиз?” деган болалар! Онасига: “Нимага туғяпсиз?” деган фарзандлар! Сизларнинг ҳолингизга вой!

¹¹Исроил халқининг муқаддас Худоси, Унинг Яратувчиси — Эгамиз шундай айтмоқда: “Хўш, энди Ўз фарзандларимнинг Тақдири ҳақида Мени сўроққа тутасизми?! Ўз қўлларим ижоди тўғрисида Менга кўрсатмалар берасизми?!

¹²Заминни барпо қилган, Ер юзида инсонни яратган Менман. Мен Ўз қўлим билан осмонни ёйдим, Барча самовий жисмларга Мен буйруқ бердим.

¹³Мен Ўзим Курушни қўзғатиб, Унга ғалаба бераман. Унинг барча йўлларини текислайман. У Менинг шаҳримни қуради. Пораю мукофот олмасдан Менинг асирларимни қўйиб юборади.” Сарвари Олам шундай деди.

¹⁴Эгамиз айтмоқда: “Мисрнинг бойликлари, Ҳабашистоннинг [3] тижорат фойдалари сеники бўлади! Саво юртининг [4] баланд бўйли одамлари сенга келади. Улар сенга эргашади. Занжирбанд бўлиб, сенга таъзим қилади. Ёлвориб: ‘Ҳа, Худо сизнинг орангизда! Бошқа ҳеч бир худо йўқ!’ дейди.”

¹⁵Эй Исроил халқининг Худоси — Қутқарувчи! Ҳақиқатан ҳам, Сен Ўзини яширадиган Худосан.

¹⁶Бут ясайдиганлар биргаликда уятга қолди. Ҳаммаси шармандаю шармисор бўлди.

¹⁷Исроилни эса Эгамиз қутқарди, То абад нажот берди! Сизлар шарманда бўлмайсиз, То абад уятга қолмайсиз!

¹⁸Эгамиз Самоларни яратган У Худодир! У ерни барпо қилган, мустаҳкамлаган. Ерни бўш қилиб эмас, Яшашга лойиқ қилиб яратган. У шундай деб айтмоқда: “Мен Эгангизман, бошқаси йўқ.

¹⁹Мен сизларга яширин жойда, Зулматли юртда гапирмадим. Мен Ёқуб наслига: ‘Бўш жойлардан Мени қидиринг!’ деб айтмадим. Мен Эгангизман. Ҳақиқатни айтаман, Тўғрисини эълон қиламан.

²⁰Эй халқларнинг омон қолганлари, Йиғилинглар, яқинлашиб, бирга келинглар! Ёғоч бутларини олиб юрадиганлар, Қутқармайдиган худога ибодат қиладиганлар Ҳеч нарсани англаб етмайдилар.

²¹Гапиринг, исбот келтиринг. Ўзаро маслаҳатлашинг. Бу тўғрида ким қадимдан хабар берди? Азалдан ким айтиб берган эди? Мен Эгангиз эмасми?! Мендан бошқа худолар йўқ! Мен одил Худоман, Қутқарувчиман! Мендан бошқаси йўқ.

²²Менга юз буринг, нажот топасиз, Эй заминнинг барча четлари! Ҳа, Мен Худоман, бошқаси йўқ.

²³Ўзим ҳақим онт ичдим [5], Оғзимдан тўғри сўз чиқди, беҳуда кетмас. Чунки Менинг олдимда ҳар бир тизза чўкка тушади, Ҳар бир тил Менга садоқат қасамини ичади.

²⁴Мен ҳақимда: ‘Фақатгина Эгамизда адолат, қудрат бор’, деб айтадилар. Мендан ғазабланганларнинг ҳаммаси Менга келадилар, улар уялиб қоладилар.

²⁵Аммо бутун Исроил насли Мен, Эгаси туфайли нажот топади. Улар мақтовга сазовор бўлади.”