Read Ўзбек тилидаги Муқаддас Китоб (ЎЗМК), 2013 Ишаё 54 Bible Online

Ишаё 54 - Ўзбек тилидаги Муқаддас Китоб (ЎЗМК), 2013 bible

Ишаё 54

¹Эгам айтар: “Эй бола кўрмаган бепушт аёл! Шодликдан ҳайқир! Эй тўлғоқ оғриғини билмаган аёл! Севинчдан ҳайқир! Ахир, ташлаб кетилган аёлнинг болалари Эри бор хотинникидан ҳам кўпроқ бўлади.

²Чодиринг жойини кенгайтиргин, Чодиринг пардаларини кенг чўздиргин! Ҳеч нарсани аяма! Арқонларингни узун ташлагин, Қозиқларингни маҳкам қоққин!

³Ахир, мулкинг ўнгу сўлга кенгайиб кетади. Авлодинг халқларни мулк қилиб олади, Улар ташландиқ шаҳарларни тўлдиради.

⁴Қўрқма, уятга қолмайсан, Уялма, шарманда бўлмайсан! Ахир, сен ёшлигингдаги шармандаликни унутасан, Бевалигингдаги шармандаликни бошқа эсламайсан.

⁵Зотан, Мен, Яратувчинг, сенинг эринг бўламан. Менинг номим Сарвари Оламдир! Мен, Исроил халқининг муқаддас Худоси, Қутқарувчингман, Мен бутун ер юзининг Худоси, деб аталаман.

⁶Эй Исроил! Сен ташлаб кетилган, Руҳи азобланган аёлдайсан. Рад этилган, ёш хотиндайсан. Аммо Мен, Эганг, сени чақириб оламан, — демоқда Худойинг. —

⁷Қисқа вақтга Мен сени тарк этгандим, Буюк шафқат ила сени қайтариб оламан.

⁸Қаттиқ ғазабда сендан бир лаҳзага юз ўгиргандим, Энди туганмас меҳр билан сенга раҳм қиламан, — демоқда Қутқарувчинг — Эгамиз. —

⁹Ҳа, Мен учун бу Нуҳ даври кабидир. Энди ер юзини Нуҳ тўфони каби, Ҳеч қачон сув босмайди, деб онт ичганман. Худди шундай қилиб, яна онт ичаман: ‘Ҳеч қачон сендан ғазабланмайман, Сенга жаҳл қилмайман!’

¹⁰Тоғлар ўрнидан қўзғалса ҳам, Тепаликлар тебранса ҳам, Менинг содиқ севгим сендан кетмайди, Менинг тинчлик аҳдим ўзгармайди, — демоқда сени севгувчи — Эгамиз. —

¹¹Эй мазлум шаҳар! Бўронларда қолдинг, аммо ҳеч ким сени юпатмади! Мана, Мен фируза тошлар ишлатиб, сени қайта қураман. Зангори ёқут тошлардан сенга пойдевор қўяман.

¹²Минораларингни ёқутлардан қураман, Дарвозаларингни гавҳарлардан қиламан, Барча деворларингни қимматбаҳо тошлардан қураман.

¹³Ҳамма болаларингга Мен, Эганг, таълим бераман, Фарзандларингнинг тинчлиги буюк бўлади.

¹⁴Мен сени душманларингдан халос қилганимда Сен бехатар бўласан. Зулм сендан узоқда бўлади, Ҳалокатдан қўрқмайсан, Чунки у сенга яқинлашмайди.

¹⁵Агар кимдир сенга ҳужум қилса, Билгинки, уни Мен қилмаган бўламан. Сенга ҳужум қилган ҳар ким мағлуб бўлади.

¹⁶Темирчига қара! У тошкўмир чўғини пуфлайди, Иши учун асбобларини ясайди. Уни Мен яратганман. Вайрон қилсин, деб Босқинчини ҳам Мен яратдим.

¹⁷Сенга қарши ясалган Ҳеч қандай қурол ғалаба қилмайди. Сен билан даъволашган ҳар бир одамнинг Даъволарини сен йўққа чиқарасан. Ана шулар Менинг қулларимнинг улушидир, Уларни Мен оқлайман.” Эгамизнинг каломи шудир.