Read Ўзбек тилидаги Муқаддас Китоб (ЎЗМК), 2013 Ишаё 57 Bible Online

Ишаё 57 - Ўзбек тилидаги Муқаддас Китоб (ЎЗМК), 2013 bible

Ишаё 57

¹Эгам айтар: “Солиҳ одамлар ўлиб кетяпти, Ҳеч ким бу ҳақда фикр юритмайди. Тақводорлар йўқ бўляпти. Ёвузликдан қутқарилсин, деб Солиҳлар оламдан ўтади. Ҳеч ким бу ҳақда ўйлаб кўрмайди.

²Солиҳ инсонлар тинчликка эришади, Тўғри юрганлар ўлимда ҳам ором топади.

³Сизлар эса, эй фолбиннинг ўғиллари, Яқинроқ келинг! Бу ёққа келинг, эй зинокор, фоҳишалар уруғи!

⁴Хўш, сизлар кимнинг устидан куляпсиз? Кимга қарши оғиз очяпсиз? Кимга қараб тилингизни чиқаряпсиз? Ахир, итоатсизларнинг болаларисиз–ку! Ёлғончининг уруғидан келиб чиққансизлар–ку! Шундай эмасми?!

⁵Ҳар бир ям–яшил дарахт остида [1] Шаҳват билан гуноҳга берилдингиз! [2] Дарё бўйларида, қоялар ковагида Ўз фарзандларингизни қурбонлик қилдингиз!

⁶Сизлар севган бутлар дарёнинг силлиқ тошлари орасидадир! Ҳа, ўша бутларга сизлар кўнгил қўйгансиз! Ана ўшаларга ичимлик назрлари бердингиз, Уларга дон назрларини атадингиз. Хўш, булар Мени қондирсинми?!

⁷Баланд, буюк тоғда ётоқ қурасиз, Қурбонлик келтирай, деб ўша ерга чиқасиз.

⁸Эшикларингиз орқасига, Эшикларингизнинг кесакиси [3] ортига Жирканч тамғаларингизни қўйдингиз. Ҳа, Мендан юз ўгирдингиз, Яланғоч бўлиб ётоғингизга кирдингиз, Ўйнашларингиз билан аҳд туздингиз, Улар билан ётишни жуда ёқтириб қолдингиз. Уларнинг яланғоч баданидан кўз узмадингиз.

⁹Зайтун мойи билан кўпгина хушбўй атирлар олиб, Ўз шоҳингизга [4] ҳадялар қилдингиз. Узоқларга, ҳатто ўликлар диёрига [5] Элчиларингизни юбордингиз.

¹⁰У ёқдан–бу ёққа юравериб, толиқдингиз, Аммо шунда ҳам умидингизни узмадингиз. Қайтадан куч тикладингиз, Шу боис ҳеч заифлашмадингиз.

¹¹Ким сизларни ваҳимага солди? Ким сизларни шунчалик қўрқитди? Ёлғон гапирдингиз. Мени эсламадингиз! Мен ҳақимда ўйлаб ҳам кўрмадингиз! Узоқ сукут сақлаганим сабабли Мендан қўрқмай қўйдингиз!

¹²Мана энди, ўзингизча тўғри, деб билган Ўша ишларингизни очиб ташлайман. Улар сизга битта ҳам фойда келтирмайди.

¹³Ёрдам сўраб, фарёд қилганингизда Атрофингиздаги бутлар сизларни қутқарсин! Уларнинг ҳаммасини шамол супуриб кетади, Шабада уларни учириб кетади. Мендан паноҳ топганлар эса юртни мулк қилиб олади, Улар Менинг муқаддас тоғимга [6] эгалик қилади.”

¹⁴Эгам шундай айтмоқда: “Тупроқ йиғиб, йўлни тайёрланг, Халқим йўлидаги тўсиқларни олиб ташланг.”

¹⁵Юксак, юқори бўлган, абадий яшайдиган Эгамиз, Номи муқаддас Эгамиз шундай айтмоқда: “Мен юксакда, муқаддас масканда яшайман. Камтарлар руҳини қайта тиклай, деб Итоаткорлар қалбини жонлантирай, деб Руҳи камтар, итоаткор одамлар билан биргаман.

¹⁶Ахир, Мен то абад даъволашмайман, Абадий қаҳр–ғазабда бўлмайман. Акс ҳолда Мен яратган тирик жонзот, Инсон зоти олдимда тура олмасди.

¹⁷Уларнинг гуноҳу ҳасадгўйлиги туфайли Ғазабланиб, уларни жазоладим. Қаҳр билан улардан юз ўгирдим, Аммо барибир истаган йўлларидан кетдилар.

¹⁸Уларнинг юрган йўлларини кўрдим, Майли, энди шифо бериб, йўл кўрсатаман, Уларга ҳам, аза тутаётганларга ҳам Ўзим тасалли бераман.

¹⁹Уларнинг тилларини мадҳияга тўлдираман. Узоғу яқиндагиларга тинчлик бўлсин! — демоқда Эгамиз. — Мен уларга шифо бераман.

²⁰Фосиқлар эса тўлқинланган денгиздайдир. Ҳа, улар тинч тура олмайдиган денгизга ўхшайди. Ўша денгизнинг сувлари лой, балчиқ келтиради.”

²¹Худойим шундай дейди: “Ёмонларга тинчлик йўқ.”