Read Ўзбек тилидаги Муқаддас Китоб (ЎЗМК), 2013 Левилар 18 Bible Online

Левилар 18 - Ўзбек тилидаги Муқаддас Китоб (ЎЗМК), 2013 bible

Левилар 18

¹Эгамиз Мусо орқали

²Исроил халқига шундай деди: “Мен Эгангиз Худоман.

³Сизлар яшаб юрган Миср халқининг одатларига ва Мен сизларни олиб бораётган Канъон юртидаги халқларнинг одатларига тақлид қилманглар. Уларнинг удумларига эргашманглар.

⁴Фақат Менинг қонунларимга итоат этинглар, қоидаларимни битта қолдирмай бажаринглар. Зотан Мен Эгангиз Худоман.

⁵Қонун–қоидаларимга амал қилинглар. Уларга риоя қилган одам ҳаётдан баҳраманд бўлар. Мен Эгангизман.

⁶Туғишган яқин қариндошингиз билан ётманг. Мен Эгангизман.

⁷Онангиз билан ётиб, отангизнинг шаънига доғ туширманг. У онангиз бўлгани учун у билан ётманг.

⁸Отангизнинг хотини билан ётманг, бундай қилиб отангизнинг шаънига доғ туширманг.

⁹Туғишган ёки ўгай опа–синглингиз билан ётманг. У отангизнинг қизи ёки онангизнинг қизи бўлишидан қатъий назар, сиз билан бир уйда катта бўлган ёки бошқа жойда ўсганидан қатъий назар, у билан ётманг.

¹⁰Ўз неварангиз — ўғлингизнинг қизи ёки қизингизнинг қизи билан ётманг. Бундай қилиб ўз шаънингизга доғ туширманг.

¹¹Отангиздан туғилган, ўгай онангизнинг қизи билан ётманг, чунки у сизнинг ўгай синглингиздир.

¹²Аммангиз билан ётманг, чунки у отангизнинг жигаридир.

¹³Холангиз билан ётманг, чунки у онангизнинг жигаридир.

¹⁴Амакингизнинг шаънига доғ тушириб, унинг хотини билан ётманг. Ахир, у сизнинг келин ойингиздир.

¹⁵Келинингиз билан ётманг. У ўғлингизнинг хотинидир.

¹⁶Ака–укангизнинг хотини билан ётманг. Бундай қилиб акангизнинг шаънига доғ туширманг.

¹⁷Сиз бирор аёл билан ётган бўлсангиз, ўша аёлнинг қизи ёки қиз невараси билан ётманг. У ўғлининг қизи ёки қизининг қизи бўлишидан қатъий назар, у билан ётманг, улар қондошдир. Бундай қилиш бузуқликдир.

¹⁸Хотинингизнинг синглисини хотинингизга кундош қилманг. Хотинингиз тирик экан, унинг синглиси билан ётманг.

¹⁹Ҳайз кўриб ҳаром бўлган аёл билан ётманг.

²⁰Қўшнингизнинг хотини билан жинсий алоқа қилиб, ўзингизни булғаманг.

²¹Болаларингизнинг бирортасини Мўлахга қурбонлик қилиб, Мен, Худойингизни бадном қилманг. Мен Эгангизман.

²²Аёл билан ётгандай, эркак киши билан ётманг. Бу жирканчдир.

²³Ҳайвон билан жинсий алоқа қилиб, ўзингизни булғаманг. Аёл киши ҳам ўзини ҳайвонга қўйиб бериб, у билан жинсий алоқа қилмасин. Бу Худо яратган тартибнинг бузилишидир.

²⁴Бундай ишлар қилиб ўзингизни булғаманг. Мен олдингиздан ҳайдаётган халқлар ана шундай ишлари туфайли булғанган эдилар.

²⁵Натижада бутун юрт ҳаром бўлиб кетди. Мен юртни жазоладим, юрт эса у ердаги халқларни қусиб юборди.

²⁶Сизлар Менинг қонун–қоидаларимга риоя қилинглар. Исроил халқидан бўлганлар ва орангизда яшаётган мусофирлар бундай жирканч ишларни қилмасин.

²⁷Зотан сизлардан олдин мана шу юртда яшаган халқлар бу жирканч ишларнинг ҳаммасини қилиб, юртни булғаган эдилар.

²⁸Агар сизлар ҳам юртни булғасангиз, бу юрт олдинги халқларни қусиб юборгандай сизларни ҳам қусиб юборади.

²⁹Бундай жирканч ишни қилган ҳар қандай одам халқ орасидан йўқ қилинсин.

³⁰Хуллас, талабларимни бажаринглар. Сизлардан олдин бу юртда қилинган жирканч ишларни қилиб, ўзингизни булғаманглар. Зотан Мен Эгангиз Худоман.”