Read Ўзбек тилидаги Муқаддас Китоб (ЎЗМК), 2013 Хўшея 5 Bible Online

Хўшея 5 - Ўзбек тилидаги Муқаддас Китоб (ЎЗМК), 2013 bible

Хўшея 5

¹Эгамиз шундай дейди: “Эй руҳонийлар, эшитинг буни! Диққат қилгин, Исроил халқи! Қулоқ солгин, шоҳ хонадони! Сизнинг устингиздан ҳукм кетяпти. Сизлар Миспахда одамлар учун тузоқ бўлдингиз, Товур тоғида ёйилган тўр бўлдингиз.

²Қотилликка ботган исёнчи сизлар! Мен ҳаммангизнинг адабингизни бераман.

³Эй Эфрайим, жуда яхши биламан сени, Исроил, Мендан яшира олмассан ўз қилмишингни. Сен, Эфрайим, Худога бевафо бўлдинг, Эй Исроил, ўзингни ҳаром қилдинг.

⁴Мен Худойингман, Аммо қилмишларинг Менга қайтиб келишингга йўл қўймас. Сен Мени — ўз Эгангни билмайсан, Чунки қалбинг шаҳватга тўлган.”

⁵Исроилнинг мағрурлиги ўзига қарши гувоҳлик беряпти, У жиноятлари туфайли қулайди. Яҳудо ҳам у билан бирга йиқилади.

⁶Исроил Эгамизнинг илтифотини излайди, Қўй–молларини қурбонлик қилади, Аммо Эгамизни топа олмайди, Чунки Эгамиз уни тарк этган.

⁷У Эгамизга хиёнат қилди, Бегоналардан орттирган болалар туғди. Кўп ўтмай у мулки билан бирга хароб бўлади.

⁸Эгамиз шундай дейди: “Бурғу чалинг Гивода! Карнай чалинг Рамада! Байт–Обунда бонг уринг! Эй Бенямин, ортингдан душман келяпти!

⁹Жазо куни Эфрайим хароб бўлади. Исроил қабилаларига эълон қилган бу сўзларим Албатта рўёбга чиқади.

¹⁰Яҳудо шаҳзодалари чегарани бузган фирибгарларга ўхшайди, Мен уларнинг устига Ўз қаҳримни жаладай ёғдираман.

¹¹Ахир, Эфрайим бутларга эргашишни афзал кўрди, Энди у эзилиб, ҳукмга бардош бера олмайди.

¹²Мен Эфрайимни куядай емираман, Яҳудо хонадонини қуртдай кемираман.

¹³Эфрайим ўз бетоблигини тушунгач, Яҳудо ўз яраларини кўргач, Эфрайим Оссурияга борди, Буюк шоҳни ёрдамга чақирди. Аммо шоҳ уларни даволай олмайди, Яраларига шифо бера олмайди.

¹⁴Мен Эфрайимга шердай ҳужум қиламан, Яҳудо хонадонига ёш арслондай ташланаман. Уларни Ўзим тилка–пора қиламан, Судраб, Ўзим билан олиб кетаман. Уларни ҳеч ким халос эта олмас.

¹⁵Улар ўз айбини бўйнига олгунча, Чин дилдан Менга интилгунча, Мен Ўз маконимга қайтиб кетаман. Балки қайғули дамларида улар Менга қайтишар.”