Read Ўзбек тилидаги Муқаддас Китоб (ЎЗМК), 2013 Саҳрода 34 Bible Online

Саҳрода 34 - Ўзбек тилидаги Муқаддас Китоб (ЎЗМК), 2013 bible

Саҳрода 34

¹Эгамиз Мусога деди:

²— Исроил халқига Менинг шу гапимни етказ: “Канъон юртига кириб борганингиздан кейин, сизларга мулк қилиб бериладиган бу юрт қуйидагича чегараланади:

³Юртингизнинг жанубий қисми Зин чўлидан Эдом юрти бўйлаб чўзилади. Жанубий чегарангиз шарқ томонда Ўлик денгизнинг [1] жанубий қирғоғидан бошланиб,

⁴Чаёнлар довонидан [2] ўтади ва жануб томонга, Зин чўли томон чўзилади. Чегарангизнинг энг жанубий нуқтаси Кадеш–Барна бўлади. У ердан чегара Хазор–Адаргача бориб, Озмон орқали ўтади.

⁵Сўнг бурилиб, Миср чегарасидаги сойлик [3] бўйлаб Ўрта ер денгизига бориб тақалади.

⁶Ўрта ер денгизининг қирғоғи ғарбий чегарангизни ташкил қилади.

⁷Шимолий чегарангиз эса Ўрта ер денгизидан шарққа, Хўр тоғига [4] томон чўзилади.

⁸Хўр тоғидан Лево–Хоматгача [5] боради, сўнг Задоддан ўтиб,

⁹Зифрўнга чўзилиб боради ва Хазор–Энанда тўхтайди. Бу сизнинг шимолий чегарангиз бўлади.

¹⁰Шарқий чегарангиз шимолдаги Хазор–Энандан бошланиб, жануб томон Шафомга боради,

¹¹сўнг яна жанубга чўзилиб, Ойиннинг шарқ томонидаги Ривлодан ўтади ва Жалила кўлининг [6] шарқ томонидаги қирлар бўйлаб боради.

¹²Сўнг чегара Иордан дарёси бўйлаб жанубга чўзилиб, Ўлик денгизга бориб тўхтайди. Ҳар томондан чегараланган мана шу ерлар сизларнинг юртингиз бўлади.”

¹³Шундан сўнг Мусо Исроил халқига буюрди: — Бу юртни қуръа ташлаб, бўлиб олинглар. Эгамиз бу юртни тўққизта қабилага ва бир қабиланинг ярмига бўлиб беришни амр этган.

¹⁴[14-15] Рубен, Гад қабилалари ва Манаше қабиласининг ярми хонадонлари бўйича Ерихо шаҳрининг рўпарасидаги Иорданнинг шарқ томонидан ўзларига тегишли мулкни олганлар.

¹⁶Эгамиз Мусога яна айтди:

¹⁷“Руҳоний Элазар ва Нун ўғли Ёшуа юртни Исроил халқига бўлиб беришсин.

¹⁸Ҳар бир қабиладан биттадан йўлбошчини уларга ёрдамчи қилиб тайинланглар.

¹⁹Ўша одамларнинг исмлари қуйидагичадир: Яҳудо қабиласидан — Яфунах ўғли Холиб.

²⁰Шимўн қабиласидан — Омиҳуд ўғли Шомуил.

²¹Бенямин қабиласидан — Хислон ўғли Элидод.

²²Дан қабиласидан — Ёхли ўғли Букки.

²³Юсуф ўғли Манаше қабиласидан — Эфўд ўғли Ханниэл.

²⁴Эфрайим қабиласидан — Шифтон ўғли Камувол.

²⁵Забулун қабиласидан — Парнўх ўғли Элизофон.

²⁶Иссахор қабиласидан — Оззон ўғли Палтиёл.

²⁷Ошер қабиласидан — Шалуми ўғли Охихуд.

²⁸Нафтали қабиласидан — Омиҳуд ўғли Падаҳиёл.”

²⁹Эгамиз ана шу одамларга, Исроил халқига Канъон юртини мулк қилиб бўлиб беринглар, деб амр берган эди.