Read Ўзбек тилидаги Муқаддас Китоб (ЎЗМК), 2013 Михо 5 Bible Online

Михо 5 - Ўзбек тилидаги Муқаддас Китоб (ЎЗМК), 2013 bible

Михо 5

¹Эй Қуддус, йиққин лашкарингни! Ғанимлар бизни қуршовга олди! Улар Исроил ҳукмдорининг бетига таёқ билан уради.

²Аммо Эгамиз демоқда: “Эй Эфратдаги Байтлаҳм, Сен Яҳудонинг митти шаҳри бўлсанг ҳам, Исроилни Мен учун бошқарадиган зот сендан чиқади. Унинг насаби қадимларга бориб тақалади.”

³Ҳа, Эгамиз Исроил халқини бир муддатга душманларга таслим қилади, Аммо бу ҳол узоқ давом этмайди. Ҳомиладор аёлнинг кўзи ёриганда, Бўлғуси ҳукмдорнинг биродарлари сургундан қайтади. Улар Исроил халқи билан бирлашади.

⁴Эгамизнинг қудрати ила ўша ҳукмдор сурувини боқади, Эгамиз Худо Ўз улуғворлиги ила уларни бошқаради. Исроил халқи хатарсиз яшайди, Ахир, ҳукмдорининг довруғи бутун дунёга ёйилади.

⁵[5-6] Ўша зот тинчлик ўрнатувчи бўлади. Мабодо Оссурияликлар Юртимизга бостириб келса, Чегарамизга қадам босишса, Ҳукмдоримиз бизни қутқаради. Xa, Оссурияликлар Юртимизга бостириб келса, Қалъаларни улар ёриб ўтса, Биз уларга қарши етти йўлбошчини танлаймиз, Ҳатто саккиз раҳнамони тайинлаймиз. Улар қилич кўтариб, Оссурияда ҳукмронлик қилишади, Қилич ўйнатиб, Нимрўднинг ерида ўз ҳукмини ўтказишади.

⁷Кўп халқлар орасида Ёқуб наслининг омон қолганлари Эгамиз осмондан тушира оладиган Шудрингдай бўлишади, Майсаларни суғорадиган Ёмғирга ўхшаган бўлишади. Уларни ҳеч ким тўхтата олмайди, Улар душманлари устига бостириб боришади.

⁸Ҳа, кўп халқлар орасида Ёқуб наслининг омон қолганлари Ўрмон ҳайвонлари орасидаги Арслондай бўлишади, Қўй сурувига кириб қолган Шер боласига ўхшаган бўлишади. Юрган йўлларида ҳаммага ташланиб ғажишади, Уларнинг қўлидан ҳеч ким қутқара олмайди.

⁹Эй Исроил, сенинг қўлинг ёвлардан баланд келади, Барча душманларинг қирилиб кетади.

¹⁰Эгамизнинг каломи шудир: “Ўша куни отларингизни Мен йўқ қиламан, Жанг араваларингизни парча–парча этаман.

¹¹Вайрон қиламан юртингиз шаҳарларини, Яксон этаман жамики қалъаларингизни.

¹²Юртингизда сеҳр–жодуга барҳам бераман, Орангизда биронта фолбинни қолдирмайман.

¹³Йўқ қиламан тасвиру бутсимон тошларингизни, Бошқа сажда қилмайсиз қўлингиз ижодига.

¹⁴Қўпориб ташлайман Ашеранинг устунларини, Шаҳарларингиз кулини кўкка совураман.

¹⁵Менга итоат қилмаган халқлар устига Қаҳру ғазабимни ёғдириб, қасос оламан.”