Read Ўзбек тилидаги Муқаддас Китоб (ЎЗМК), 2013 Закариё 13 Bible Online

Закариё 13 - Ўзбек тилидаги Муқаддас Китоб (ЎЗМК), 2013 bible

Закариё 13

¹[1-2] Сарвари Олам шундай айтмоқда: “Ўша куни Довуд авлоди ва Қуддус аҳолиси учун бир фаввора очилади. Бу фаввора уларнинг барча гуноҳлари ва нопокликларини тозалайди. Ўша куни Мен бу юртдан барча бутларни йўқ қиламан. Ҳатто уларнинг номлари ҳам унутилади. Мен бу юртдан яна сохта пайғамбарларни ва уларни илҳомлантирадиган нопок руҳни олиб ташлайман.

³Агар яна сохта пайғамбар чиқса, ўз ота–онаси унга шундай дейди: — Сен энди яшамайсан, чунки сен Эгамиз номидан ёлғон гапларни гапиряпсан. Ўша пайғамбар яна башорат қилганда ўз туққан ота–онаси уни найза санчиб ўлдиради.

⁴Ўша куни пайғамбарларнинг ҳар бири ўзларининг башоратларидан уятга қоладилар. Улар энди халқни алдаб пайғамбарларнинг жунли кийимларини киймайдилар.

⁵Энди улар: — Мен пайғамбар эмасман, мен ерга ишлов бераман. Ёшлигимдан бир кишининг хизматидаман, — дейдилар.

⁶Агар бирортаси улардан: — Кўкрагингиздаги яралар қаердан келган? — деб сўраса, уларнинг жавоби қуйидагича бўлади: — Мен бу яраларни дўстларимнинг уйида орттирдим.”

⁷Сарвари Олам шундай демоқда: “Қани, қўзғалгин, эй қилич! Менга яқин бўлганга, Менинг Ўз чўпонимга қарши чиқ. Чўпонга ҳамла қилгин, Шунда қўйлар ҳар ёққа сочилиб кетади, Мен қўзичоқларга қарши қўлимни кўтараман.

⁸Бутун юртда халқнинг учдан икки қисми ҳалок бўлади, — деб айтмоқда Эгамиз. — Учдан бир қисми эса тирик қолади.

⁹Мен мана шу қолган учдан бир қисмини Оловдан ўтказгандай қиламан. Уларни кумушни тоблагандай тоблайман, Олтинни синагандай синайман. Улар Менга илтижо қиладилар, Мен эса уларга жавоб бераман. ‘Улар Менинг халқимдир’, дейман Мен. Улар эса: ‘Эгамиз бизнинг Худомиздир’, деб айтишади.”