Read Ўзбек тилидаги Муқаддас Китоб (ЎЗМК), 2013 Ҳакамлар 17 Bible Online

Ҳакамлар 17 - Ўзбек тилидаги Муқаддас Китоб (ЎЗМК), 2013 bible

Ҳакамлар 17

¹Эфрайим қирларида Михо деган бир одам яшарди.

²Бир куни у онасига шундай деди: — Ойи, эсингиздами 1100 бўлак кумушни [1] ўғирлатиб қўйган эдингиз? Ўшанда ўғрини олдимда қарғагансиз. Мана, ўша кумушингиз. Уни мен олгандим. Шунда онаси: — Илойим барака топгин, ўғлим! — деди.

³Михо 1100 бўлак кумушни онасига қайтариб берди. Онаси эса: — Мен бу кумушни бош–кўзингдан садақа қилиб, Эгамга бағишлайман, — деди, — ундан қуйма ва ўйма бутлар ясаттираман. Ўша кумуш ўзингга қайтиб келади, ўғлим.

⁴Онаси Михо қайтариб берган кумуш бўлакларнинг 200 тасини [2] заргарга берди. Заргар бут ясаб, уни кумуш билан қоплади [3]. Тайёр бўлган бут Михонинг уйига ўрнатилди.

⁵Михонинг бир саждагоҳи бор эди. У руҳонийлар киядиган махсус либос [4] тиктириб, яна бир нечта хонаки санамлар [5] ясаттирди, сўнг ўғилларидан бирини ўзининг саждагоҳига руҳоний қилиб тайинлади.

⁶Ўша даврда Исроилда шоҳ йўқ эди. Ҳар бир одам билганини қилар эди.

⁷Яҳудо ҳудудидаги Байтлаҳм шаҳрида [6] бир ёш леви [7] яшарди.

⁸Бу одам ўзига бошқа жойдан бошпана топмоқчи бўлиб, Байтлаҳмни тарк этди. У йўл юриб, Эфрайим қирларидаги Михонинг уйига келиб қолди.

⁹— Қаерликсан, ўғлим? — деб сўради ундан Михо. — Мен Яҳудодаги Байтлаҳмдан келган левиман, — деб жавоб берди у. — Ўзимга бошпана қидириб юрибман.

¹⁰— Кел, меникида турақол, — деди Михо. — Менинг маслаҳатчим ҳамда руҳонийим бўл. Мен эса ҳар йили сенга ўн бўлакдан кумуш [8] тўлаб, кийим–кечагинг билан егулигингни бераман.

¹¹[11-12] Леви Михоникида туришга рози бўлди. Михо уни руҳоний қилиб тайинлади. Леви Михоникида яшаб юрди ва Михога худди ўғлидай бўлиб қолди.

¹³Шунда Михо деди: “Мана, энди Эгам мени баракали қилишини биламан, чунки левининг ўзи менга руҳоний бўлиб хизмат қиляпти.”