Read Uzbek Muqaddas Kitob Ibtido 12 Bible Online

Ibtido 12 - Uzbek Muqaddas Kitob bible

Ibtido 12

¹Shundan keyin Egamiz Ibromga[80] dedi: “Oʻz yurtingdan, qarindosh — urugʻlaring oldidan — otang xonadonidan chiqib ket. Men senga bir yurtni koʻrsataman, oʻsha yerga borasan.

²Buyuk xalqning otasi qilaman seni, Baraka beraman senga, Ulugʻ qilaman sening nomingni, Baraka manbayi boʻlasan sen.

³Men baraka berarman seni duo qilganlarga, Seni la’natlaganlarni Men la’natlayman. Sen orqali baraka toparlar Yer yuzidagi jamiki xalqlar.”

⁴Egamiz amr qilganday, Ibrom ketdi. Lut ham Ibrom bilan birga ketdi. Ibrom Xorondan[81] chiqib ketganda, yetmish besh yoshda edi.

⁵Ibrom xotini Sorayni[82], jiyani Lutni, Xoronda xizmatga olgan odamlarini boshlab, toʻplagan jamiki mol — mulkini olib, Kan’on yurtiga qarab yoʻlga tushdi. Nihoyat, ular Kan’on yurtiga yetib kelishdi.

⁶Ibrom bu yurtda koʻchib yurib, Shakam[83] yaqinidagi Moʻre nomli muqaddas eman daraxti[84] yoniga yetib kelib toʻxtadi. Oʻsha paytlarda bu yurtda Kan’on xalqi yashardi.

⁷Shu yerda Egamiz Ibromga zohir boʻlib: “Mana shu yurtni sening naslingga beraman”, dedi. Shunday qilib, Ibrom zohir boʻlgan Egamizga atab oʻsha yerda qurbongoh qurdi.

⁸Shundan soʻng Ibrom Baytilning sharqidagi qirlarga yoʻl oldi. Baytil bilan Ay shaharlarining oʻrtasida[85] chodir tikdi. Chodirdan gʻarb tomonda Baytil, sharq tomonda Ay shaharlari bor edi. Bu yerda u qurbongoh qurib, Egamizga sajda qildi.

⁹Ibrom u joydan bu joyga koʻchib, janubga — Nagav choʻliga[86] ketdi.

¹⁰Oʻsha paytda Kan’onda qahatchilik haddan ortiq avjiga chiqdi. Shuning uchun Ibrom, qahatchilik tugaguncha kutib turay deb, Misrga yoʻl oldi.

¹¹Ibrom Misr chegarasiga yaqinlashganda, xotini Sorayga dedi: — Sen juda ham goʻzal ayolsan.

¹²Misrliklar seni koʻrganlarida: “Manavi ayol — uning xotini”, deb aytishadi. Meni oʻldirib, seni tirik qoldirishadi.

¹³Sen, uning singlisiman, deb aytgin, toki sen tufayli Misrliklar menga yaxshi munosabatda boʻlsinlar, jonimga rahm qilsinlar.

¹⁴Ibrom Misrga kirib kelganda, Sorayning goʻzalligi hammaning ogʻzida duv — duv gap boʻldi.

¹⁵Saroy a’yonlari ham Sorayni koʻrishgach, uni fir’avnga rosa maqtashdi. Shunday qilib, Sorayni fir’avnning saroyiga olib kelishdi.

¹⁶Fir’avn Soray tufayli Ibromga ham koʻp muruvvat qildi: mol — qoʻy, eshaklar, qul va choʻrilar, tuyalar in’om qildi.

¹⁷Lekin fir’avn Sorayni oʻz haramiga olmoqchi boʻlgani uchun, Egamiz fir’avn xonadoniga dahshatli oʻlat kasalligini yubordi.

¹⁸Fir’avn Ibromni chaqirtirib kelib, unga dedi: — Bu nima qilganing? Nima qilib qoʻyding meni? Nimaga Soray xotining ekanini menga aytmading?

¹⁹Nimaga, u mening singlim, deb aytding? Gapingga ishonib, uni oʻzimga xotin qilib olmoqchi boʻldim — a! Mana xotining, ol — da, koʻzimdan yoʻqol!

²⁰Fir’avn oʻz odamlariga farmon bergan edi, ular Ibromni xotini, hamma odamlari va mol — mulki bilan birga yurtdan chiqarib yubordilar.