Read Uzbek Muqaddas Kitob Ibtido 13 Bible Online

Ibtido 13 - Uzbek Muqaddas Kitob bible

Ibtido 13

¹Shunday qilib, Ibrom[87] xotinini, jiyani Lutni va bor mol — mulkini olib, Misrdan chiqdi va shimolga — Nagav choʻliga[88] yoʻl oldi.

²Ibrom endi juda boyib ketgan, mol — qoʻylari, kumushu oltini koʻp edi.

³U Nagav choʻlidan Baytilga borguncha bir joydan ikkinchi joyga koʻchib yurdi. Nihoyat, Baytil bilan Ay oraligʻiga[89] yetib keldi. U oldin ham shu yerda chodir tikib,

⁴qurbongoh qurgan edi. Ibrom oʻsha yerda yana Egamizga sajda qildi.

⁵Ibrom bilan birga ketayotgan Lut ham juda boy boʻlib, mol — qoʻylari, koʻplab chodirlari bor edi.

⁶Ikkovlari chorvasi bilan bir joyda yashashlari uchun yer torlik qilib qoldi.

⁷Qolaversa, Ibromning choʻponlari bilan Lutning choʻponlari oʻrtasida janjal chiqib qoldi. Bu paytda oʻsha yurtda Kan’on va Pariz xalqlari yashardilar.

⁸Shunda Ibrom Lutga dedi: — Mening choʻponlarim bilan sening choʻponlaring oʻrtasida janjal boʻlmasligi kerak. Axir, biz yaqin qarindoshlarmiz.

⁹Nima qilishimiz lozimligini men senga aytay. Sen mana shu yerdan yaxshi joyini keragicha tanlab ol, keyin bir — birimizdan ajralaylik. Agar sen chap tomonga ketsang, men oʻng tomonga ketaman, agar sen oʻng tomonga ketsang, men chap tomonga ketaman.

¹⁰Lut Zoʻvar tomondagi Iordan vodiysining serhosil tekisliklariga qaradi. Hamma yoq sersuv, goʻyo Egamiz yaratgan boqqa[90] va Misrning ajoyib yerlariga oʻxshardi. Egamiz Sadoʻm va Gʻamoʻra shaharlarini vayron qilmasdan oldin vodiy shunaqa edi.

¹¹Shunday qilib, Lut Iordan tekisliklarini tanladi va sharq tomonga ketdi. Shu tariqa Ibrom bilan Lut bir — biridan ayrildilar.

¹²Ibrom Kan’on yurtida oʻrnashdi, Lut esa Iordan tekisliklaridagi shaharlar orasiga oʻrnashib, chodirlarini Sadoʻm yoniga koʻchirdi.

¹³Sadoʻm aholisi oʻta qabih boʻlib, Egamizga qarshi ogʻir gunohlar qilar edilar.

¹⁴Lut Ibromdan ayrilib ketgandan keyin, Egamiz Ibromga dedi: — Mana shu turgan joyingdan shimolga, janubga, sharqqa va gʻarbga qara.

¹⁵Sen koʻrib turgan hamma yerni senga va sening naslingga abadiy mulk qilib beraman.

¹⁶Men sening naslingni yerdagi qumday koʻpaytiraman. Kimki yerdagi qumni sanay olsa, sening naslingni ham sanay oladi.

¹⁷Qani, otlan, yurtni aylanib chiq. Men bu yurtni senga mulk qilib beraman.

¹⁸Shunday qilib, Ibrom chodirini yigʻishtirib, Xevrondagi[91] Mamre nomli muqaddas emanzor[92] yoniga keldi va oʻsha yerda oʻrnashdi. U yerda Egamizga qurbongoh qurdi.