Read Uzbek Muqaddas Kitob Ibtido 14 Bible Online

Ibtido 14 - Uzbek Muqaddas Kitob bible

Ibtido 14

¹Oʻsha paytda Shinarda[93] Omrafil, Elazarda Oriyox, Elamda Kadoʻrlamar va Goʻyimda Tidol hukmronlik qilar edilar.

²Ular ittifoq tuzib, quyidagi beshta shohga qarshi urush ochdilar: Sadoʻm shohi Beraga, Gʻamoʻra shohi Birshaga, Adma shohi Shinavga, Zavoʻyim shohi Shemoverga va Belax shohiga. (Belax hozir Zoʻvar deb yuritiladi.)

³Ana shu beshta shoh ittifoq tuzib, Siddim vodiysida kuchlarini birlashtirgandilar. (Siddim vodiysi hozirgi Oʻlik dengizdir[94].)

⁴Bu shohlar oʻn ikki yil davomida Kadoʻrlamarga qaram boʻlib kelgandilar. Oʻn uchinchi yili esa unga qarshi isyon koʻtargandilar.

⁵Isyondan bir yil oʻtgandan keyin Kadoʻrlamar va uning ittifoqchilari lashkarlari bilan kelib, Ashtaroʻt — Karnayimdagi Rafa xalqini, Xomdagi Zuz xalqini, Xiratayim tekisligidagi Eyim xalqini,

⁶Seir[95] togʻlaridagi Xorim xalqini[96] choʻlning chetidagi El — Porongacha ta’qib qilib borib, magʻlub qildilar.

⁷Soʻngra ular orqaga qaytib, En — Mishpat shahriga keldilar va Omoleklarning butun yerlarini, shuningdek, Xazazon — Tamarda yashayotgan Amor xalqini qoʻlga oldilar. (En — Mishpat hozir Kadesh deb yuritiladi.)

⁸Sadoʻm, Gʻamoʻra, Adma, Zavoʻyim va Belax, ya’ni Zoʻvar shohlari oʻz lashkarlarini Siddim vodiysida[97] saf torttirib, Elam shohi Kadoʻrlamarning va Goʻyim, Shinar va Elazar shohlarining lashkarlariga qarshi jangga tayyor qilib qoʻydilar. Xullas, toʻrtta shoh beshta shohga qarshi otlandi.

¹⁰Vodiyda qora saqich toʻldirilgan chuqurlar koʻp edi. Sadoʻm va Gʻamoʻra shohlari qochib ketayotganlarida, ularning jangchilari oʻsha chuqurlarga yiqilib tushdilar. Tirik qolganlari togʻlarga qochib qutulib qoldilar.

¹¹Shunday qilib, bosqinchilar Sadoʻm va Gʻamoʻrani talon — taroj qilib, u yerdagi hamma boyliklarni, gʻamlab qoʻyilgan oziq — ovqatlarni olib, oʻz yoʻllariga ketdilar.

¹²Ibromning[98] jiyani Lut Sadoʻmda yashayotgan edi. Bosqinchilar Lutni asirga olib, bor narsasini oʻlja qilib oldilar.

¹³Bir odam bosqinchilardan qutulib, ibroniy Ibromning yoniga qochib bordi va boʻlgan voqeani unga soʻzlab berdi. Ibrom bu paytda Amor xalqidan boʻlgan Mamre degan odamning emanzori[99] yonida chodir tikkan edi. Mamre va uning Eshkoʻl, Onar degan ukalari[100] Ibromning ittifoqchilari edilar.

¹⁴Ibrom Lutning asirga olinganini eshitgach, oʻz xonadonidagi qurol ushlashga qodir hamma odamlarni toʻpladi. Ular 318 kishi edi. U Kadoʻrlamarning lashkari ortidan quvib, Dan shahrida[101] ularga yetib oldi.

¹⁵Ibrom oʻsha yerda odamlarini guruhlarga boʻlib, tunda har tomondan ularga hujum qildi. Kadoʻrlamarning lashkari qochdi, lekin Ibrom ularni Damashqning shimolidagi Xoʻvax shahrigacha quvlab bordi.

¹⁶Ibrom bilan uning ittifoqchilari hamma narsani — oʻlja olingan narsalarni, Ibromning jiyani Lutni va uning mol — mulkini, ayollarni va boshqa asirlarni qaytarib olib keldilar.

¹⁷Ibrom Kadoʻrlamar va uning ittifoqchilari ustidan gʻalaba qilib qaytib kelayotganda, Sadoʻm shohi uni kutib olgani Shovey soyligiga keldi. (Shovey soyligi Shoh soyligi[102] deb ham atalgan.)

¹⁸Salim[103] shohi Maliksidiq ham Ibromni kutib olgani chiqib, non va sharob olib keldi. U Xudoyi Taoloning ruhoniysi ham edi.

¹⁹Maliksidiq Ibromni shunday deb duo qildi: “Yeru koʻkni yaratgan[104] Xudoyi Taolo Ibromga baraka bersin.

²⁰Yovlaringni qoʻlingga bergan Xudoyi Taologa Hamdu sanolar boʻlsin.” Ibrom qaytarib olib kelgan hamma narsaning oʻndan birini Maliksidiqqa berdi.

²¹Soʻngra Sadoʻm shohi Bera Ibromga shunday dedi: — Odamlarimni oʻzimga qaytarib bersang boʻldi, qaytarib olib kelgan hamma narsani oʻzingga olaver.

²²Lekin Ibrom Sadoʻm shohiga shunday javob berdi: — Yeru koʻkni yaratgan Egamiz — Xudoyi Taolo haqi qasam ichib aytamanki,

²³men sening birorta choʻpingni yoki chorigʻingning ipini ham olmayman. Aks holda: “Ibromni men boy qilganman”, deb aytishing mumkin.

²⁴Yigitlarimning yeb — ichganidan tashqari, men sendan hech narsa olmayman. Men bilan birga borgan ittifoqchilarim Onar, Eshkoʻl va Mamre esa oʻzlarining ulushlarini olishsin.