Read Uzbek Muqaddas Kitob Ibtido 15 Bible Online

Ibtido 15 - Uzbek Muqaddas Kitob bible

Ibtido 15

¹Shundan keyin Egamiz Ibromga[105] shu soʻzlarni vahiyda ayon qildi: — Qoʻrqma, Ibrom, Men senga qalqon boʻlaman, senga beradigan mukofotim buyuk boʻladi.

²— Ey Egam Rabbiy! Sen menga nima ham berar eding?! Men hamon befarzandman, butun mol — mulkim Damashqlik xizmatkorim Eliazarga qoladi.

³Sen menga farzand bermading, shuning uchun xonadonimda tugʻilgan qulim mening merosxoʻrim boʻladi — da.

⁴Lekin Ibromga Egamiz yana shu soʻzlarni ayon qildi: — Yoʻq, quling sening merosxoʻring boʻlmaydi, oʻzingning pushti kamaringdan boʻladigan oʻgʻling sening hamma mol — mulkingga merosxoʻr boʻladi.

⁵Soʻngra Egamiz Ibromni tashqariga olib chiqib, unga: — Osmonga qara, agar yulduzlarni sanay olsang, sanab koʻr, — dedi. Egamiz yana aytdi: — Sening nasling ham oʻsha yulduzlarga oʻxshagan koʻp boʻladi.

⁶Ibrom Egamizga ishondi, Egamiz uni ishonchi uchun solih deb bildi.

⁷Soʻngra Egamiz unga dedi: — Men sening Egangman, bu yurtni senga mulk qilib bermoqchiman, shuning uchun seni Xaldeydagi Ur shahridan[106] olib chiqqanman.

⁸— Ey Egam Rabbiy! Bu yurtni meros qilib olishimga qanday ishonch hosil qilaman? — deb soʻradi Ibrom.

⁹— Menga uch yoshli gʻunajin, uch yoshli echki, uch yoshli qoʻchqor, kaptar, musichani olib kel, — dedi Egamiz.

¹⁰Egamiz nima aytgan boʻlsa, hammasini Ibrom olib kelib, soʻydi. Hayvonlarni uzunasiga oʻrtasidan boʻlib, boʻlaklarni bir — biriga qaratib qoʻydi. Lekin qushlarni ikkiga boʻlmadi.

¹¹Quzgʻunlar goʻshtlarni yeyish uchun qoʻnganda, Ibrom quzgʻunlarni haydadi.

¹²Quyosh botayotganda, Ibromni qattiq uyqu bosdi. Uni qoʻrquv, vahima qamrab oldi.

¹³Shunda Egamiz Ibromga aytdi: — Shuni yaxshi bilib qoʻyki, sening nasling begona yurtda musofir boʻlib yashaydi. Toʻrt yuz yil qul boʻlib, jabr — zulm tortadi.

¹⁴Lekin Men sening naslingni qul qilgan xalqni jazolayman. Sening nasling begona yurtdan katta boylik bilan chiqib ketadi.

¹⁵Sen juda ham keksayib olamdan oʻtib, dafn etilasan, ota — bobolaring yoniga xotirjam ketasan.

¹⁶Sening nasling toʻrt avlod oʻtgandan keyin[107] bu yerga qaytib keladi, chunki Amor xalqlarining qabihligi hali haddan oshmadi[108].

¹⁷Quyosh botib, qorongʻi tushgandan keyin, Ibrom ichidan tutun chiqib turgan togʻorani va yonayotgan mash’alani koʻrdi. Oʻsha togʻora va mash’ala boʻgʻizlangan hayvon boʻlaklari orasidan oʻtdi[109].

¹⁸Shunday qilib, oʻsha kuni Egamiz Ibrom bilan ahd qildi va shunday dedi: — Men sening naslingga Misrdagi daryodan[110] tortib buyuk Furot daryosigacha boʻlgan joylarni

¹⁹— Xayin, Xanaz, Kadmon,

²⁰Xet, Pariz, Rafa,

²¹Amor, Kan’on, Girgosh, Yobus xalqlarining yerlarini beraman.