Read Uzbek Muqaddas Kitob Ibtido 17 Bible Online

Ibtido 17 - Uzbek Muqaddas Kitob bible

Ibtido 17

¹Ibrom[122] toʻqson toʻqqiz yoshga kirganda, Egamiz unga zohir boʻlib, dedi: — Men Qodir Xudoman. Men koʻrsatgan yoʻldan yur, har doim pokdil boʻlib yashagin.

²Men sen bilan ahd qilaman, senga juda koʻp nasllar ato qilaman.

³Ibrom yerga muk tushib ta’zim qildi. Keyin Xudo unga aytdi:

⁴— Sen bilan qiladigan ahdim shudir: sen koʻplab xalqlarning otasi boʻlasan.

⁵Endi sening ismingni oʻzgartiraman. Isming endi Ibrom emas, Ibrohim[123] boʻladi. Chunki Men seni koʻplab xalqlarning otasi qilaman.

⁶Seni juda ham barakali qilaman, sendan xalqlar yarataman, sendan shohlar kelib chiqadi.

⁷Men senga va sendan keyingi nasllaringga bergan va’damda turaman. Bu abadiy ahd boʻladi. Men doimo Sening Xudoying, sendan keyingi nasllaringning Xudosi boʻlib qolaman.

⁸Sen musofir boʻlib yashab turgan mana shu Kan’on yurtining hammasini Men senga va nasllaringga abadiy mulk qilib beraman. Men ularning Xudosi boʻlaman.

⁹Xudo Ibrohimga yana dedi: — Sen va sendan keyingi nasllaring avlodlar osha Men bilan qilgan ahdga rioya qilishlaringiz lozim.

¹⁰Sen va sening nasllaring rioya qilishlaringiz kerak boʻlgan ahdim quyidagichadir: orangizdagi har bir erkak sunnat qilinsin.

¹¹Sunnat — sen bilan Mening oʻrtamizdagi ahdning belgisi boʻladi.

¹²Hozirdan boshlab nasllar osha xonadoningdagi har bir oʻgʻil bola tugʻilgandan keyin sakkiz kun oʻtgach, sunnat qilinsin. Bu faqat sening oila a’zolaringgagina tegishli boʻlmay, balki xonadoningda tugʻilgan xizmatkorlaringga va sening naslingdan boʻlmagan, begonalardan sotib olgan xizmatkorlaringga ham tegishlidir.

¹³Xonadoningda tugʻilgan xizmatkorlaring ham, sotib olingan xizmatkorlaring ham sunnat qilinsin. Shunday qilib, Mening sen bilan qilgan ahdim abadiy ekanini tanangizdagi belgi koʻrsatib turadi.

¹⁴Sunnat qilinmagan erkak xalqim orasidan yoʻq qilinsin. U Mening ahdimni buzgan hisoblanadi.

¹⁵Xudo Ibrohimga yana aytdi: — Xotining Sorayga kelsak, uning ismi bundan keyin Soray boʻlmasin. Hozirdan boshlab uni Sora[124] deb chaqir.

¹⁶Men Soraga marhamat koʻrsataman. Men undan senga oʻgʻil ato qilaman. Ha, Men Soraga shunchalik baraka beramanki, u koʻp xalqlarning onasi boʻladi. Uning nasllari orasidan shohlar chiqadi.

¹⁷Ibrohim muk tushib ta’zim qildi, keyin kulib qoʻydi — da, oʻziga oʻzi dedi: “Yuz yoshga kirgan odam bola koʻrar ekanmi?! Buning ustiga, Sora ham toʻqsonga kirdi, endi bola tugʻarmidi?!”

¹⁸Ibrohim Xudoga: — Qaniydi, Ismoil Sening marhamating ostida yashasa, — dedi.

¹⁹— Yoʻq, xotining Sora senga oʻgʻil tugʻib beradi, — dedi Xudo. — Sen oʻgʻlingning otini Is’hoq[125] qoʻyasan. Men oʻgʻling bilan va uning kelgusi nasli bilan abadiy ahdimni davom ettiraman.

²⁰Ismoil toʻgʻrisida qilgan iltimosingni ham eshitdim. Men unga baraka beraman, uning naslini haddan tashqari koʻpaytiraman. U oʻn ikki yoʻlboshchining otasi boʻladi. Undan buyuk xalq keltirib chiqaraman.

²¹Lekin Men Oʻz ahdimni tugʻiladigan oʻgʻling Is’hoq bilan qilaman. Kelgusi yili xuddi shu paytda Sora senga Is’hoqni tugʻib beradi.

²²Xudo Ibrohim bilan gaplashib boʻlgach, uning yonidan ketdi.

²³Oʻsha kuniyoq Ibrohim Xudo amr etganday qildi: oʻgʻli Ismoilni, xonadonida tugʻilgan xizmatkorlarini, begonalardan sotib olgan xizmatkorlarini — xonadonidagi hamma erkakni sunnat qildi.

²⁴Ibrohim sunnat qilinganda, toʻqson toʻqqiz yoshda,

²⁵oʻgʻli Ismoil oʻn uch yoshda edi.

²⁶Ibrohim bilan oʻgʻli bir kunda sunnat qilindilar.

²⁷Shunday qilib, Ibrohimning xonadonidagi jamiki erkak zoti ham u bilan birga sunnat qilindi.