Read Uzbek Muqaddas Kitob Ibtido 18 Bible Online

Ibtido 18 - Uzbek Muqaddas Kitob bible

Ibtido 18

¹Kunning jazirama issiq payti edi. Ibrohim Mamredagi muqaddas emanzorda[126] chodiriga kiraverishda oʻtirgan edi, shu payt Egamiz unga zohir boʻldi.

²Shu lahzada Ibrohim roʻparasida uchta odam turganini bildi. Ibrohim uchalasini koʻrgan zahoti ularni kutib olgani yugurib bordi va muk tushib ta’zim qildi.

³— Hazratim[127], — dedi Ibrohim, — marhamatingizni darigʻ tutmanglar, bu qulingizning eshigini bosib oʻtib ketmanglar.

⁴Xizmatkorlarim suv keltirishsin, oyoqlaringizni yuvishsin, oʻzlaringiz daraxtning soyasida dam olinglar.

⁵Modomiki, bu qulingizning xonadoniga tashrif buyuribsizlar, men non — pon olib kelay. Sayohatingizni davom ettirishdan oldin bardam boʻlib olinglar. — Mayli, — deyishdi ular, — aytganingday qilaver.

⁶Ibrohim shoshilganicha chodirga qaytdi — da, Soraga dedi: — Tez boʻl! Unning yaxshisidan darrov bir togʻora[128] olib, non yop.

⁷Soʻngra podaga borib, semiz buzoqni tanladi va xizmatkoriga berdi. Xizmatkor darrov buzoqni soʻyib, taom tayyorlashga kirishdi.

⁸U suzma, sut va pishirib tayyorlangan buzoq goʻshtini olib, mehmonlarning oldiga qoʻydi. Mehmonlar ovqatlanishayotganda, Ibrohim daraxt ostida ularga oʻzi xizmat qilib turdi.

⁹— Xotining Sora qayerda? — deb soʻrashdi ular. — Shu yerda, chodirda, — deb javob berdi Ibrohim.

¹⁰Ulardan biri[129]: — Men kelgusi yili shu paytda[130] qaytib kelganimda, xotining Sora oʻgʻilli boʻladi, — dedi. Sora chodir pardasining orqasida, chodirga kiraverish yonida bu suhbatni eshitib turardi.

¹¹Bu paytda Ibrohim ham, Sora ham juda keksayib qolishgan, Sora bola tugʻish davridan ancha oʻtgan edi.

¹²U ichida kulib, oʻzicha oʻyladi: “Men munkillagan kampir boʻlsam — u, qanday qilib lazzatlana olardim?! Buning ustiga, xoʻjayinim ham qarib qolgan boʻlsa.”

¹³Shunda Egamiz[131] yana Ibrohimga aytdi: — Nima uchun Sora kuldi? Nimaga u: “Qarib qolgan boʻlsam, bola tugʻarmidim”, dedi?

¹⁴Men — Egangiz uchun imkonsiz narsa bor ekanmi?! Kelgusi yil shu paytda Men qaytib kelaman. Oʻshanda Sora oʻgʻilli boʻladi.

¹⁵Lekin Sora qoʻrqib ketgan edi. — Kulmadim, — deb gapidan tondi u. — Yoʻq, kulding, — dedi Egamiz.

¹⁶Shundan keyin uchalovi oʻrinlaridan turib, Sadoʻm tomonga yoʻl oldilar. Ibrohim, ularni kuzatib qoʻyay deb, birga yurdi.

¹⁷Egamiz: “Men qilmoqchi boʻlgan ishlarimni Ibrohimdan sir tutmayman”, dedi Oʻziga.

¹⁸“Ibrohimdan buyuk, qudratli xalq kelib chiqadi. Yer yuzidagi jamiki xalqlar u orqali baraka topadi.

¹⁹Ibrohim oʻgʻillarini, oʻz naslini Mening yoʻlimdan yurishga, toʻgʻrilik va adolat bilan ish qilishlariga yoʻl koʻrsatsin deb, uni tanlaganman. Shunda Men Ibrohimga bergan va’damni bajaraman.”

²⁰Soʻngra Egamiz Ibrohimga dedi: — Sadoʻm va Gʻamoʻra aholisining razilligi, ularning ogʻir gunohlari haqidagi ohu figʻonlar Menga yetib keldi.

²¹Men pastga tushib koʻray — chi, ularning hammasi haqiqatan ham shunchalik gunohga botib ketibdimikan?!

²²Shundan keyin ikki kishi Sadoʻmga qarab yoʻl oldi. Egamiz esa Ibrohim bilan qoldi.

²³Ibrohim Unga qarab, soʻradi: — Sen gunohkorni ham, begunohni ham birday qirib tashlayverasanmi?

²⁴Aytaylik, shaharda ellikta begunoh odam topsang, shaharni vayron qilaverasanmi? Begunoh odamlarning haqi — hurmati uchun shaharga rahm qilmaysanmi?

²⁵Nahotki gunohsiz odamni gunohkor bilan birga yoʻq qilsang?! Aslo! Sen gunohsizning boshiga gunohkorning kunini solmaysan — ku! Axir, Sen butun olamning Hokimisan, adolat ila ish tutasan!

²⁶— Agar Men Sadoʻmda ellikta begunoh odamni topsam, — dedi Egamiz, — ularning haqi — hurmati uchun butun shaharga rahm qilaman.

²⁷— Ey Rabbiy! Men tuproq va kul boʻlsam ham, Senga gapirayotganimda qoʻpolligim uchun kechirgin, — dedi Ibrohim.

²⁸— Ellikta begunoh odamga beshta yetmasa — chi? Beshta kam boʻlgani uchun butun shaharni qirib tashlaysanmi? — Agar u yerda qirq beshta solih odamni topsam, shaharni qirib tashlamayman.

²⁹Ibrohim Egamizga yana gapirdi: — Balki u yerda qirqta begunoh odam topilar. — Oʻsha qirqta begunohning haqi — hurmati uchun bu ishni qilmayman, — dedi Egamiz.

³⁰— Yo Rabbiy! — dedi Ibrohim. — Gapirsam, Oʻzing kechirgaysan. Balki u yerda oʻttizta begunoh topilar? — Agar u yerda oʻttizta begunoh odamni topsam, shaharni qirib tashlamayman, — deb javob berdi U.

³¹— Rabbiy! Gapirayotganimda qoʻpolligim uchun kechirgin, — dedi Ibrohim. — Balki u yerda yigirmata begunoh odam topilar? — Oʻsha yigirmata begunoh odamning haqi — hurmati uchun shaharni qirib tashlamayman, — dedi U.

³²— Rabbiy! Yana bir marta gapirsam, Oʻzing kechirgaysan, — dedi Ibrohim. — Balki u yerda oʻnta begunoh odam topilar? — Oʻsha oʻnta begunoh odamning haqi — hurmati uchun shaharni qirib tashlamayman, — deb javob berdi Egamiz.

³³Egamiz Ibrohim bilan gaplashib boʻlgach, Oʻz yoʻliga ketdi. Ibrohim ham chodiriga qaytdi.