Read Uzbek Muqaddas Kitob Ibtido 20 Bible Online

Ibtido 20 - Uzbek Muqaddas Kitob bible

Ibtido 20

¹Ibrohim bu yerdan koʻchib, janubga — Nagav choʻli[138] tomonga yoʻl oldi va Kadesh bilan Shur oraligʻida joylashdi. Keyinroq Garorga[139] ketdi. U yerda bir oz yashadi.

²Ibrohim bu yerdagi odamlarga xotini Sorani, u mening singlim, deb aytar edi. Garor shohi Abumalek odam yuborib, Sorani saroyiga oldirib keldi.

³Abumalek kechasi tush koʻrdi. Tushida Xudo zohir boʻlib, unga dedi: “Sen mana shu xotinni olganing uchun oʻlasan, chunki uning eri bor.”

⁴Lekin Abumalek hali Soraga yaqinlashmagan edi. — Yo Rabbiy! — dedi Abumalek. — Men begunohman — ku! Endi begunoh odamni ham oʻldiraverasanmi?

⁵Ibrohim menga, u mening singlim, dedi — ku! Ayolning oʻzi ham, Ibrohim — mening akam, dedi. Men bu ishni pok koʻngil bilan qildim.

⁶Xudo Abumalekka tushida yana dedi: — Sening pok koʻngilli ekaningni bilaman. Shu sababdan Menga qarshi gunoh qilishdan seni saqladim. Soraga tegishingga yoʻl qoʻymadim.

⁷Endi sen bu ayolni eriga qaytarib ber. Uning eri — paygʻambar, sen uchun ibodat qiladi. Shunda sen tirik qolasan. Agar bu ayolni eriga qaytarib bermasang, shuni bilib qoʻyki, oʻzing ham, butun oila a’zolaring ham oʻlasizlar.

⁸Ertasi kuni saharda Abumalek hamma a’yonlarini chaqirib, ularga boʻlgan voqeani aytib berdi. Hammalari qattiq vahimaga tushdilar.

⁹Keyin Abumalek Ibrohimni chaqirtirib, unga dedi: — Bizni nima qilib qoʻyding? Senga qarshi qanday gunoh qilibman — a?! Men ham, shohligim ham shunchalik ogʻir gunohga botishiga sen sababchi boʻlding! Sen menga hech kim hech qachon qilmasligi kerak boʻlgan ishni qilding.

¹⁰Abumalek Ibrohimdan: — Nimani oʻylab bu ishni qilding? — deb soʻradi.

¹¹— Bu yerda hech kim Xudodan qoʻrqmaydi, xotinimni tortib olish uchun meni oʻldiradilar, deb oʻyladim, — dedi Ibrohim.

¹²— Buning ustiga, u haqiqatan ham mening singlim, otamiz bir, lekin onamiz boshqa — boshqa boʻlgani uchun unga uylanganman.

¹³Xudo meni otamning xonadonidan begona yurtlarga sayohatga olib ketganda, xotinimga shunday degan edim: “Qayerga borsak ham, men toʻgʻrimda gapirganingda, u mening akam, deb aytgin. Shunda menga sodiqligingni koʻrsatgan boʻlasan.”

¹⁴Shundan keyin Abumalek mol — qoʻyidan, qul va choʻrilaridan Ibrohimga berdi. Xotini Sorani ham qaytarib berdi.

¹⁵— Mana, shohligimga qarashli yerlar qarshingda turibdi, — dedi Abumalek. — Qayerda yashashni xohlasang, oʻsha joyni tanlab olaver.

¹⁶Soraga esa shunday dedi: — Mana, akangga ming boʻlak kumushni[140] tovon qilib toʻlayapman. Bu kumushlar yoningdagilarga sening pokligingni isbotlaydi[141].

¹⁷Xudo Sora tufayli Abumalekning xonadonidagi hamma ayolni tugʻmaydigan qilib qoʻygan edi. Ibrohim Xudoga ibodat qildi. Xudo Abumalekka shifo berdi, shuningdek, uning xotini va choʻrilariga ham shifo berib, ularni tugʻadigan qildi.