Read Uzbek Muqaddas Kitob Ibtido 21 Bible Online

Ibtido 21 - Uzbek Muqaddas Kitob bible

Ibtido 21

¹Egamiz bergan va’dasi boʻyicha Soraga marhamat qildi.

²Sora homilador boʻlib, Ibrohimga qarigan chogʻida oʻgʻil tugʻib berdi. Bularning hammasi Xudo aytgan vaqtda yuz berdi.

³Ibrohim oʻgʻliga Is’hoq deb ism qoʻydi.

⁴Xudo amr qilganday, Is’hoq sakkiz kunlik boʻlganda, Ibrohim uni sunnat qildi[142].

⁵Is’hoq tugʻilganda, Ibrohim yuz yoshda edi.

⁶Sora dedi: “Xudo menga shodlik va kulgi[143] ato qildi, bu haqda eshitgan har kim men bilan birga kuladi.

⁷Kim ham, Sora chaqaloq emizadi, deb Ibrohimga ayta olardi?! Men esa Ibrohimga qarigan chogʻida oʻgʻil tugʻib berdim.”

⁸Vaqt oʻtib, Is’hoq katta boʻlib qolgach, Sora uni koʻkrakdan chiqardi. Bu baxtli kunni nishonlab, Ibrohim katta ziyofat berdi[144].

⁹Misrlik Hojarning Ibrohimga tugʻib bergan oʻgʻli Ismoil[145] Is’hoqni[146] masxara qilayotganini[147] Sora koʻrib qoldi.

¹⁰Sora Ibrohimdan: — Bu choʻrini oʻgʻli bilan birga haydab yuboring! — deb talab qildi. — Choʻrining oʻgʻli mening oʻgʻlim bilan merosxoʻr boʻlmasin[148].

¹¹Bu gapdan Ibrohim juda xafa boʻldi, axir, Ismoil ham uning oʻgʻli edi — da.

¹²Lekin Xudo Ibrohimga dedi: — Bola va choʻri xotining uchun tashvish tortma. Soraning aytganlarini qil. Chunki Men senga va’da qilgan nasling Is’hoq orqali kelib chiqadi.

¹³Choʻri xotiningning bolasi sening ham oʻgʻling boʻlgani uchun Men unga ham farzandlar ato etib, undan xalqlar yarataman.

¹⁴Ibrohim ertasiga saharda turdi. Bir oz yegulik va bir mesh suv olib, Hojarning yelkasiga yukladi — da, oʻgʻli bilan birga joʻnatib yubordi. Hojar Bersheba atroflarida choʻlda bemaqsad izgʻib yurdi.

¹⁵Meshdagi suv tamom boʻlgach, Hojar bolasini bir butaning tagida qoldirdi.

¹⁶Soʻngra: “Bolamning oʻlishini koʻrmayin”, deb bolasidan bir oʻq otimi[149] nariga borib oʻtirdi. Hojar oʻsha yerda oʻtirib, yigʻlab, faryod qila boshladi.

¹⁷Xudo oʻsmirning yigʻisini eshitdi. Xudoning farishtasi samodan Hojarni chaqirib dedi: — Nimaga gʻam chekyapsan, Hojar? Qoʻrqma, sen oʻsmirni qoldirib ketgan joydan Xudo uning yigʻisini eshitdi.

¹⁸Qani, oʻgʻlingni turgiz, uning qoʻlidan ushla. Men uning naslidan buyuk xalq yarataman.

¹⁹Xudo Hojarning koʻzini ochib yuborgan edi, u bir quduqni koʻrdi. Borib, meshni suvga toʻldirib keldi — da, bolasiga ichirdi.

²⁰Xudo doimo bola bilan birga boʻldi. Bola Poron choʻlida[150] oʻsib — ulgʻaydi. U mohir kamonkash boʻldi.

²¹Onasi uni Misr yurtidan bir qizga uylantirdi.

²²Bir kuni Abumalek[151] lashkarboshisi Pixol bilan birga Ibrohimning oldiga bordi va unga dedi: — Sen har qanday ishni qilganingda ham Xudo sen bilan birga.

²³Endi Xudoning nomini oʻrtaga qoʻyib, seni, bolalaringni, naslingni aldamayman, deb qasam ich. Men senga sodiqligimni koʻrsatdim. Shuning uchun hozir, senga va men istiqomat qilib turgan shu yurtingga sodiq boʻlaman, deb qasam ich.

²⁴— Qasam ichaman, — dedi Ibrohim.

²⁵Shunda Ibrohim Abumalekka: “Xizmatkorlaring zoʻrlik bilan mening qudugʻimni tortib olishdi”, deb shikoyat qilib qoldi.

²⁶— Bu haqda birinchi marta eshityapman, — dedi Abumalek. — Sen menga bu haqda aytmagan eding. Bu ishni kim qilganini bilmayman.

²⁷Shunday qilib, Ibrohim Abumalekka mol — qoʻylar berdi va ikkalasi ahd qildilar.

²⁸Ibrohim yettita urgʻochi qoʻzini suruvdan ajratib oldi.

²⁹Abumalek Ibrohimdan: — Sen yettita urgʻochi qoʻzini ajratib olding, buning ma’nosi nima? — deb soʻradi.

³⁰Ibrohim shunday javob berdi: — Mana shu yettita urgʻochi qoʻzini sen qoʻlimdan olishing kerak, toki bu quduqni oʻzim qaziganimni bular isbotlaydi[152].

³¹Shunday qilib, ikkovlari qasamyod qilishdi. Shuning uchun bu joy hozirgacha Bersheba[153] deb yuritiladi.

³²Ular ahd qilganlaridan keyin, Abumalek oʻz lashkarboshisi Pixol bilan Filistlar yeridagi Garor shahriga qaytib ketdi.

³³Ibrohim Bershebada yulgʻun daraxti[154] oʻtqazdi va u yerda abadiy Xudoga — Egamizga sajda qildi.

³⁴U Filistlar yerida ancha vaqt yashadi.