Read Uzbek Muqaddas Kitob Ibtido 22 Bible Online

Ibtido 22 - Uzbek Muqaddas Kitob bible

Ibtido 22

¹Shu voqealardan keyin Xudo Ibrohimni sinadi. — Ibrohim! — deb chaqirdi Xudo. — Labbay! — deb javob berdi Ibrohim.

²— Yolgʻiz suyukli oʻgʻling Is’hoqni olib, Moriyox yeriga[155] bor, — dedi Xudo. — Men senga bir togʻni koʻrsataman, oʻsha togʻda oʻgʻlingni qurbonlik qilib kuydirasan.

³Ertasi kuni Ibrohim saharda turib, eshagini egarladi. Olovda kuydiriladigan qurbonlik uchun oʻtin tayyorladi. Soʻng ikki xizmatkori va oʻgʻli Is’hoqni yoniga olib, Xudo aytgan yerga joʻnadi.

⁴Uch kun yoʻl yurganlaridan keyin, Ibrohim uzoqdan oʻsha joyni koʻrdi.

⁵Ibrohim xizmatkorlariga dedi: — Sizlar shu yerda — eshakning yonida qolinglar. Oʻgʻlim bilan hov anavi yerga boramiz — u, u yerda sajda qilib, shu yerga qaytib kelamiz.

⁶Ibrohim qurbonlik kuydirish uchun oʻtinni olib, oʻgʻli Is’hoqning yelkasiga ortdi. Oʻzi esa pichoq bilan choʻgʻni olib ketdi. Ikkovlari birga ketishdi.

⁷— Otajon! — dedi bir payt Is’hoq otasiga. — Labbay, oʻgʻlim, — deb javob berdi Ibrohim. — Olov bilan oʻtin bor — u, lekin qurbonlik qilib kuydiriladigan qoʻzi qani? — deb soʻradi Is’hoq.

⁸— Qurbonlik qilib kuydiriladigan qoʻzini Xudoning Oʻzi beradi[156], oʻgʻlim, — deb javob qildi Ibrohim. Shunday qilib, ikkovlari birga yoʻlda davom etishdi.

⁹Ular Xudo koʻrsatgan yerga yetib kelganlaridan keyin, Ibrohim qurbongoh qurib, qurbongohga oʻtin qaladi. Soʻngra u oʻgʻli Is’hoqni bogʻlab, qurbongohdagi oʻtinlar ustiga yotqizdi.

¹⁰Ibrohim pichoqni oldi va oʻgʻlini boʻgʻizlashga shaylandi.

¹¹Shu payt Egamizning farishtasi samodan unga hayqirdi: — Ibrohim! Ibrohim! — Labbay! — deb javob berdi Ibrohim.

¹²— Pichoqni tashla! — deb buyurdi farishta. — Bunday qilma, bolaga zarar yetkazma. Endi bildim, sen haqiqatan Xudodan qoʻrqar ekansan. Sen hatto yagona oʻgʻlingni ham Mendan ayamading.

¹³Ibrohim boshini koʻtarib, qoʻchqorni koʻrib qoldi. Qoʻchqorning shohlari chakalaklarga oʻralib qolgan edi. Ibrohim qoʻchqorni ushlab, qurbongohda oʻgʻlining oʻrniga kuydirib qurbonlik qildi.

¹⁴Shuning uchun bu joyga Ibrohim “Egamiz beradi”[157] deb nom qoʻydi. Bu nom bugungi kunda[158]: “Egamizning togʻida[159] beriladi[160]” degan hikmatga aylanib ketgan.

¹⁵Shundan keyin Egamizning farishtasi samodan Ibrohimni yana chaqirdi:

¹⁶— Egang aytmoqda: “Menga itoat qilganing uchun, hatto yagona oʻgʻlingni ham Mendan ayamaganing uchun Oʻzimning nomim bilan qasamyod qilaman[161]:

¹⁷senga albatta qut — baraka beraman. Naslingni osmondagi yulduzlarday, dengiz qirgʻogʻidagi qumday son — sanoqsiz qilib koʻpaytiraman. Nasling gʻanimlarining darvozalarini egallaydilar.

¹⁸Menga itoat qilganing uchun yer yuzidagi hamma xalqlar sening nasling orqali baraka topadi.”

¹⁹Shunday qilib, Ibrohim oʻgʻli bilan birga xizmatkorlari yoniga qaytib keldi va Bershebaga — uyiga yoʻl oldi. Ibrohim Bershebada yashab qoldi.

²⁰Shundan keyin Ibrohim: “Ukang Naxoʻrning xotini Milxo sakkiz nafar oʻgʻil tuqqan” degan xabarni eshitdi.

²¹Toʻngʻich oʻgʻlining ismi Uz, keyingisining oti Buz, undan keyingisiniki Kamuvol (Kamuvol Oramning otasi boʻldi),

²²Xosit, Xazo, Pildash, Yidlaf, Batuval edi.

²³Batuval bir qiz koʻrib, otini Rivqo qoʻydi.

²⁴Milxo tugʻib bergan sakkiz nafar oʻgʻlidan tashqari, Naxoʻrning Ravumo degan choʻrisi[162] ham unga toʻrt oʻgʻil tugʻib berdi. Bu oʻgʻillarining ismi Tavax, Gaxam, Taxash va Maxo edi.