Read Uzbek Muqaddas Kitob Ibtido 23 Bible Online

Ibtido 23 - Uzbek Muqaddas Kitob bible

Ibtido 23

¹Sora 127 yoshida,

²Kan’on yurtidagi Xirat — Arbada vafot etdi. (Xirat — Arba hozir Xevron deb yuritiladi.) Ibrohim Soraga aza tutib, yigʻladi.

³U Soraning jasadini qoldirib, Xet xalqidan[163] boʻlgan oqsoqollar oldiga bordi va ularga dedi:

⁴— Men sizlarning orangizda yashayotgan bir musofirman. Iltimos, menga yeringizdan ozgina joyini sotinglar, toki marhumamni dafn qilay.

⁵Xet xalqidan boʻlgan oqsoqollar Ibrohimga shunday javob berishdi:

⁶— Gapimizga quloq soling, toʻram! Biz sizni ulugʻ bek deb hisoblaymiz. Xotiningizni dafn qilishingiz uchun joylarimizdan eng yaxshisini tanlab oling. Marhumangizni dafn qilishingiz uchun birortamiz sizdan maqbara uchun yer ayamaymiz.

⁷Ibrohim ularga egilib ta’zim qildi.

⁸Keyin dedi: — Marhumamni dafn qilishimga rozi ekansizlar, endi mening gapimga quloq solinglar, Zoʻxar oʻgʻli Efroʻnga mening iltimosimni yetkazinglar.

⁹U oʻzining Maxpaladagi dalasining chetida joylashgan gʻorni menga sotsin. Men gʻorning toʻliq narxini toʻlayman, toki sizlarning guvohligingizda gʻor mening xonadonim uchun maqbara boʻlsin.

¹⁰Efroʻn shu paytda shahar darvozasida[164] yigʻilgan oʻz xalqi orasida oʻtirgan edi. U jamiki Xet xalqiga eshittirib, Ibrohimga shunday javob berdi:

¹¹— Toʻram, endi mening gapimni eshitsinlar. Men dalamni, dalamdagi gʻorni ham sizga in’om qilaman. Xalqimning guvohligida bularni sizga beraman. Marhumangizni dafn qilavering.

¹²Ibrohim yurt xalqiga yana ta’zim qildi.

¹³U yurt xalqiga eshittirib, Efroʻnga shunday javob berdi: — Rahmat, lekin men butun dalangiz uchun kumush toʻlab, sotib olay, toki marhumamni u yerga olib borib, dafn qilay. Iltimos, mening taklifimni rad etmang.

¹⁴— E toʻram, — dedi Efroʻn Ibrohimga, — toʻrt yuz boʻlak kumush[165] turadigan bir parcha yer bizning oramizda nima boʻpti?! Marhumangizni dafn qilavering.

¹⁶Ibrohim rozi boʻlib, Efroʻn hammaga eshittirib aytgan toʻrt yuz boʻlak kumushni unga tortib berdi. Bu oʻlchov savdogarlar orasida muomalada edi.

¹⁷Shunday qilib, Efroʻnning Mamre sharqida joylashgan Maxpaladagi mulki Ibrohimga oʻtdi. Mulk dalani, daladagi gʻorni va dalaning chetidagi hamma daraxtlarni oʻz ichiga olar edi.

¹⁸Bular shahar darvozasida yigʻilgan Xet xalqining guvohligida Ibrohimning doimiy mulki boʻlib qoldi.

¹⁹Shundan keyin Ibrohim Kan’on yurtida Mamre sharqidagi Maxpala dalasining chetida joylashgan gʻorga xotini Sorani dafn qildi. (Mamre Xevronda joylashgan.)

²⁰Shunday qilib, Xet xalqiga qarashli boʻlgan dala va u yerdagi gʻor maqbara sifatida Ibrohimning doimiy mulki boʻlib qoldi.