Read Uzbek Muqaddas Kitob Ibtido 25 Bible Online

Ibtido 25 - Uzbek Muqaddas Kitob bible

Ibtido 25

¹Ibrohim boshqa ayolga uylandi. U ayolning ismi Xaturo edi.

²U Ibrohimga bir necha oʻgʻil tugʻib berdi. Oʻgʻillarning ismi Zimron, Yoxshon, Midon, Midiyon, Yishboq va Shuvax edi.

³Yoxshonning Shava va Dedon degan oʻgʻillari bor edi. Dedonning nasli Ashur, Latush va Lum xalqlari edi.

⁴Midiyonning oʻgʻillari Efax, Ifar, Xanoʻx, Avido va Eldax edilar. Xaturodan bino boʻlgan oʻgʻillari mana shular edilar.

⁵Ibrohim butun mol — mulkini oʻgʻli Is’hoqqa berdi.

⁶Ibrohim hayot ekan, choʻrilari[174] tugʻib bergan oʻgʻillariga hadyalar berdi va oʻsha oʻgʻillarini Is’hoqning oldidan nariga — sharq tomondagi yurtga joʻnatdi.

⁷Ibrohim 175 yil yashab,

⁸nuroniy yoshda, keksayib, olamdan oʻtdi.

⁹Oʻgʻillari Is’hoq bilan Ismoil uni Mamre sharqidagi Maxpala dalasining chetida joylashgan gʻorga dafn qildilar. Bu dala ilgari Xet xalqidan boʻlgan Zoʻxar oʻgʻli Efroʻnniki edi.

¹⁰Bu dalani Ibrohim Xet xalqidan[175] sotib olgan edi. Ibrohim bu gʻorda xotini Soraning yoniga dafn qilindi[176].

¹¹Ibrohim vafot etgandan keyin, Xudo uning oʻgʻli Is’hoqqa baraka berdi. Is’hoq Ber — Laxay — Ruy qudugʻi[177] yonida istiqomat qilardi.

¹²Soraning Misrlik choʻrisi Hojar Ibrohimga tugʻib bergan Ismoilning nasl — nasabi tarixi quyidagichadir:

¹³Tugʻilish tartibiga koʻra, Ismoil oʻgʻillarining ismlari quyidagicha: toʻngʻich oʻgʻli — Navayot, keyingilari Kedar, Adbal, Mivsom,

¹⁴Mishmo, Dumax, Masso,

¹⁵Hadad, Temo, Yatur, Nofish va Kedemax.

¹⁶Ismoilning bu oʻn ikki oʻgʻli oʻn ikki qabilaning yoʻlboshchisi boʻldilar. Oʻsha qabilalar chodir qurib joylashgan yerlarga ularning ismlari berildi.

¹⁷Ismoil 137 yoshida olamdan oʻtdi.

¹⁸Ismoilning nasli Ossuriyaga ketaverishda — Misrning sharqidagi Xavila bilan Shur orasida oʻrnashdi. Ular qarindoshlariga dushman boʻlib yashardilar[178].

¹⁹Ibrohim oʻgʻli Is’hoqning xonadoni tarixi quyidagichadir: Ibrohim Is’hoqning otasi edi.

²⁰Is’hoq Rivqoga uylanganda qirq yoshda edi. Rivqo Batuvalning qizi, Lobonning singlisi edi. Batuval Oramlik boʻlib, Paddon — Oramdan[179] edi.

²¹Rivqoning bolasi boʻlmadi. Is’hoq xotini uchun Egamizga iltijo qildi. Egamiz uning iltijolarini eshitdi. Rivqo homilador boʻldi.

²²Rivqoning qornidagi bolalari bir — biri bilan urishardilar. Rivqo: “Agar shunaqa boʻlsa, homilador boʻlishimning nima foydasi bor?!”[180] deb bu haqda Egamizdan soʻradi.

²³Egamiz Rivqoga shunday dedi: “Sening qorningda ikki xalq bor, Sendan tugʻilganlar ikki xalqqa boʻlinar[181]. Biri ikkinchisidan kuchli chiqajak, Kattasi kichigiga xizmat qilajak.”

²⁴Rivqoning oy — kuni yaqinlashib, egizak tugʻdi.

²⁵Toʻngʻichi tugʻilganda, qip — qizil[182] ekan. Uning tanasi jun matoga oʻxshardi. Shuning uchun uning ismini Esov qoʻydilar[183].

²⁶Ukasi esa Esovning tovonini ushlab tugʻildi, shuning uchun uning ismini Yoqub qoʻydilar[184]. Egizaklar tugʻilganda, Is’hoq oltmish yoshda edi.

²⁷Bolalar ulgʻaydilar. Esov — dala — dashtni yaxshi koʻradigan mohir ovchi, Yoqub esa uyda oʻtirishni yoqtiradigan, beozor odam boʻldi.

²⁸Esov ovlab kelgan hayvonlarning goʻshtini Is’hoq tanovul qilib, lazzat olar, shuning uchun u Esovni yaxshi koʻrardi. Rivqo esa Yoqubni yaxshi koʻrardi.

²⁹Bir kuni Yoqub yasmiq[185] shavla pishirayotgan edi, Esov daladan ochqab, sulayib kelib qoldi.

³⁰Esov Yoqubga: — Menga ana shu qizil ovqatingdan bergin, oʻlguday qornim ochdi, — dedi. (Shuning uchun u Edom[186] degan ism ham olgan.)

³¹— Boʻpti, — dedi Yoqub, — lekin buning evaziga menga toʻngʻichlik huquqingni[187] sot.

³²— E, toʻngʻichlik huquqimdan menga nima foyda, qornim ochganidan oʻlay deb turibman, — dedi Esov.

³³— Oldin menga qasam ich, — dedi Yoqub. Esov Yoqubga qasam ichdi. Shunday qilib, u toʻngʻichlik huquqini Yoqubga sotdi.

³⁴Shundan keyin Yoqub Esovga non bilan yasmiq shavla berdi. Esov yeb — ichib, oʻrnidan turdi — da, oʻz ishlari bilan chiqib ketdi. Shunday qilib, Esov oʻzining toʻngʻichlik huquqini mensimadi.