Read Uzbek Muqaddas Kitob Ibtido 29 Bible Online

Ibtido 29 - Uzbek Muqaddas Kitob bible

Ibtido 29

¹Yoqub yoʻlida davom etib, nihoyat, sharqdagi yurtga yetib keldi.

²U dashtda bir quduqni uzoqdan turib koʻrdi. Quduq yonida uch toʻp poda yotardi. Chorva shu quduqdan sugʻorilar, quduqning ogʻzi kattakon tosh bilan yopib qoʻyilardi.

³Choʻponlar hamma qoʻy — echkilarni u yerga haydab kelganlaridan keyin, quduqning ogʻzidagi toshni surishib, qoʻylarni sugʻorishardi — da, quduqning ogʻzini yana oʻsha tosh bilan berkitib qoʻyishardi.

⁴Yoqub choʻponlarning oldiga borib, ulardan: — Birodarlar, qayerliksizlar? — deb soʻradi. — Xorondanmiz[208], — deb javob berishdi ular.

⁵— Lobon degan odamni taniysizlarmi? — deb soʻradi Yoqub, — u Naxoʻrning nabirasi boʻladi. — Ha, taniymiz, — deb javob berishdi choʻponlar.

⁶— Lobon tinch — omonmi? — deb soʻradi Yoqub. — Yaxshi, — deb javob berishdi choʻponlar. — Ana, uning qizi Rohila ham qoʻylarini haydab shu yoqqa kelyapti.

⁷— Suruvni bir joyga toʻplabsizlar, lekin hozir payti emas — ku, oqshomgacha hali erta! — dedi Yoqub. — Qoʻylarni sugʻorib, oʻtlatgani qaytarib olib bormaysizlarmi?

⁸Choʻponlar shunday javob berishdi: — Hamma suruvni bu yerga toʻplab, toshni quduqning ogʻzidan surganimizdan keyingina qoʻylarni sugʻoramiz.

⁹Yoqub choʻponlar bilan gaplashib turganda, Rohila otasining qoʻylarini haydab kelib qoldi. Rohila choʻponlik qilardi.

¹⁰Yoqub togʻasi Lobonning qizi Rohilani va uning qoʻylarini koʻrdi. Quduq yoniga borib, quduq ogʻzidagi toshni surdi — da, togʻasining qoʻylarini sugʻordi.

¹¹Keyin Rohilani oʻpdi, xursandligidan koʻzlariga yosh keldi.

¹²— Men otangning jiyaniman, ammang Rivqoning oʻgʻliman, — deb Yoqub oʻzini tanishtirdi. Rohila yugurib borib, otasiga xabar berdi.

¹³Lobon, singlimning oʻgʻli kelibdi, deb eshitdi — yu, oʻsha zahoti, Yoqubni kutib olishga shoshildi. Yoqub bilan quchoqlashib koʻrishdi. Lobon Yoqubni uyiga olib keldi. Yoqub boshidan kechirganlarini togʻasiga aytib berdi.

¹⁴— Sen mening jigarimsan, oilamning bir a’zosisan, — dedi Lobon. Yoqub Lobonnikida bir oy turgandan keyin,

¹⁵Lobon unga dedi: — Sen mening qarindoshim boʻlsang ham, tekinga ishlamasliging kerak. Ayt — chi, xizmat haqingga nima istaysan?

¹⁶Lobonning ikki qizi boʻlib, kattasining ismi — Leax, kichiginiki — Rohila edi.

¹⁷Leaxning koʻzlari chiroyli[209], Rohila esa har jihatdan goʻzal — yuzi chiroyli, qaddi — qomati kelishgan edi.

¹⁸Yoqub Rohilani sevardi, shuning uchun: “Men sizga kichik qizingiz Rohila uchun yetti yil xizmat qilib beraman”, dedi.

¹⁹Shunda Lobon unga dedi: — Mayli, roziman, qizimni begonaga berganimdan koʻra, senga berganim yaxshi — ku. Menikida qolaver.

²⁰Shunday qilib, Yoqub Rohilaga qalin uchun yetti yil xizmat qildi. Lekin Yoqubning Rohilaga boʻlgan sevgisi shunchalik kuchli ediki, yetti yil bir necha kunday tuyuldi.

²¹Nihoyat, Yoqub Rohilaga uylanadigan payt ham keldi. — Men shartni bajardim, — dedi Yoqub Lobonga. — Endi qizingizga uylanishimga ijozat bering.

²²Lobon butun yurt aholisini toʻplab, ziyofat berdi.

²³Lekin oʻsha kuni kechasi Lobon Rohilaning oʻrniga, toʻngʻich qizi Leaxni Yoqubga berdi. Leaxga xizmat qilsin deb, Lobon oʻzining Zilpo degan choʻrisini Leaxga berdi. Yoqub Leaxning yoniga kirdi.

²⁵Yoqub ertalab turib qarasa, yonida Leax yotibdi! — Bu nima qilganingiz?! — dedi Yoqub gʻazablanib Lobonga. — Men sizga yetti yil Rohila uchun xizmat qildim — ku! Nimaga meni aldadingiz?

²⁶— Bizning yurtdagi odat boʻyicha, katta qizdan oldin kichigi turmushga berilmaydi, — deb javob berdi Lobon.

²⁷— Bir haftada bu qizimning toʻyi tantanasi tugaydi, kutib tur. Agar menga yana yetti yil xizmat qilib beradigan boʻlsang, xizmating evaziga kichkinasini ham senga beraman.

²⁸Yoqub rozi boʻldi. Bir haftadan keyin Yoqub bilan Leaxning toʻyi tantanasi tugadi. Lobon Rohilani ham Yoqubga berdi.

²⁹Lobon oʻzining Bilxax degan choʻrisini qizi Rohilaga bergan edi.

³⁰Shunday qilib, Yoqub Rohilaning yoniga kirdi. U Leaxdan koʻra, Rohilani koʻproq yaxshi koʻrardi. Yoqub Lobonga yana yetti yil xizmat qilib berdi.

³¹Yoqub Leaxga koʻngilsiz ekanini Egamiz koʻrib turardi. Shuning uchun U Leaxni tugʻishga qodir qildi, Rohila esa befarzand oʻtaverdi.

³²Leax homilador boʻlib, oʻgʻil tugʻdi. U: “Egam mening baxtsizligimni koʻrdi, endi erim menga albatta koʻngil qoʻyadi”, deb oʻgʻlining ismini Ruben[210] qoʻydi.

³³Leax homilador boʻlib, yana oʻgʻil tugʻdi. “Erim menga koʻngilsizligini Egam eshitib, yana bir oʻgʻil berdi”, deb oʻgʻlining ismini Shimoʻn[211] qoʻydi.

³⁴Leax yana homilador boʻldi va yana oʻgʻil tugʻdi. U: “Erimga uchta oʻgʻil tugʻib berdim, endi u albatta menga bogʻlanib qoladi”, deb oʻgʻlining ismini Levi[212] qoʻydi.

³⁵Leax yana homilador boʻlib, yana oʻgʻil tugʻdi. U: “Endi Egamga hamdu sano aytaman”, deb oʻgʻlining ismini Yahudo[213] qoʻydi. Shundan keyin u tugʻishdan qoldi.