Read Uzbek Muqaddas Kitob Ibtido 34 Bible Online

Ibtido 34 - Uzbek Muqaddas Kitob bible

Ibtido 34

¹Bir kuni Yoqub va Leaxning qizi Dina shu yerlik qizlarni koʻrishga bordi.

²Bu yerning begi Xamoʻr boʻlib, u Xiv urugʻidan edi. Xamoʻrning oʻgʻli Shakam qizni koʻrib qolib, ushladi va uning nomusiga tegdi.

³Shakam Dinani qattiq sevib qoldi, qizning sevgisini qozonishga harakat qildi.

⁴Otasiga: “Shu qizni menga olib bering”, deb aytdi.

⁵Yoqub qizining nomusi toptalganini eshitdi. Yoqubning oʻgʻillari esa dalada mol — qoʻylarini boqib yurgan edilar. Ular qaytib kelgunlaricha Yoqub oʻzini bosib turdi.

⁶Shakamning otasi Xamoʻr bu ish yuzasidan gaplashgani Yoqubning oldiga keldi.

⁷Shu paytda Yoqubning oʻgʻillari daladan kelib qolishdi. Singillari sharmanda boʻlganini eshitishdi — yu, qattiq gʻazablanib, tutaqib ketdilar. Shakam Yoqubning qizini bulgʻab, Isroilda sharmandali ish qilgan edi. Bunday ish hech boʻlmasligi kerak edi.

⁸Xamoʻr ularga: — Oʻgʻlim Shakamning qizingizga ishqi tushib qolibdi, iltimos, qizingizni oʻgʻlimga bersangizlar, — dedi.

⁹— Bir — birimiz bilan quda — andachilik qilaylik, qizlaringizni oʻgʻillarimizga olib beraylik, oʻgʻillaringizga qizlarimizni olib beringlar.

¹⁰Shunda yurtimizda biz bilan birga, xohlagan yeringizda yashayverasizlar, bemalol savdo — sotiq qilaverasizlar[256], yerlarimizdan oʻzlaringizga mulk orttirasizlar.

¹¹Shakam ham Dinaning otasi bilan akalariga iltimos qilib, dedi: — Menga muruvvat qilinglar, Dinani menga beringlar, evaziga istagan narsalaringizni beraman.

¹²Qancha qalin yoki sovgʻa talab qilasizlar — men uchun ahamiyati yoʻq, beraman. Faqat qizingizga uylansam boʻldi.

¹³Shakam Dinani sharmanda qilgani uchun, Shakam bilan Xamoʻrni Dinaning akalari aldadilar.

¹⁴Ular Shakam bilan Xamoʻrga dedilar: — Singlimizni qandaydir sunnatsiz odamga berolmaymiz. Agar bersak, biz isnodga qolamiz[257].

¹⁵Biz faqat bir shart bilan rozi boʻlamiz: hamma erkaklaringiz bizga oʻxshab sunnat qilinishlari kerak.

¹⁶Shunda biz qizlarimizni sizlarga beramiz, sizlarning qizlaringizni olamiz. Sizlarning orangizda yashab, sizlar bilan bir xalq boʻlamiz.

¹⁷Lekin bizning shartimizga koʻnmasdan, sunnat qilinmasangizlar, singlimizni[258] olib ketamiz.

¹⁸Ularning gapiga Xamoʻr bilan Shakam bajonidil rozi boʻlishdi.

¹⁹Shakam Dinaga xushtor boʻlib qolganidan, bu talabni bajarishni tezlashtirdi. U oilasida hurmatga sazovor, eng obroʻli odam edi.

²⁰Xamoʻr bilan Shakam shahar darvozasiga[259] kelib, shaharning oqsoqollariga shunday deyishdi:

²¹— U odamlar — bizning doʻstlarimiz. Ular bizning yurtimizda yashab, savdo — sotiq qilaversinlar. Yurtimiz keng, ularga ham yetadi. Shunda bir — birimiz bilan qiz olib, qiz berishamiz.

²²Ular faqat bir shart bilan bizning oramizda yashab, biz bilan bir xalq boʻlishga rozi: oramizdagi hamma erkaklar, ular singari, sunnat boʻlishlari kerak ekan.

²³Agar biz shunday qilsak, ularning hamma qoʻy — echkilari, mol — mulki bizniki boʻladi. Kelinglar, ularning aytganlariga rozi boʻlaylik, toki ular bizning oramizda yashab qolishsin.

²⁴Shahar darvozasiga borganlar Xamoʻr bilan uning oʻgʻli Shakamning gaplarini eshitgach, rozi boʻldilar. Butun shahar erkaklari sunnat qilindilar.

²⁵Oradan uch kun oʻtdi. Shaharning hamma erkaklari sunnat qilinganlari uchun hali ham ogʻrib yotgan edilar. Yoqubning ikki oʻgʻli — Dinaning akalari Shimoʻn bilan Levi[260] qilichlarini oldilar va bamaylixotir shaharga kirdilar. Shahardagi hamma erkakni oʻldirdilar.

²⁶Xamoʻr bilan uning oʻgʻli Shakamni ham oʻldirib, Shakamning uyidan Dinani olib ketdilar.

²⁷Yoqubning qolgan oʻgʻillari, singlimizni sharmanda qilganlari uchun qasos olamiz deb, jasadlarni talab, shaharni talon — taroj qildilar.

²⁸Ular shahardagi va dalalardagi jamiki qoʻy — echkilarni, mol podalarini, eshaklarni olib ketdilar.

²⁹Shahar xalqining hamma boyliklarini, uylaridagi hamma narsasini oʻlja qilib, bolalarini va ayollarini asir qilib olib ketdilar.

³⁰Shunda Yoqub Shimoʻn bilan Leviga dedi: — Sizlar boshimga balo keltirdingiz. Endi bu yurtdagi Kan’on va Pariz xalqlari, qolaversa, hamma meni yomon koʻradi. Biz ozchilik boʻlsak, axir. Ular birgalashib hujum qilib qolgudek boʻlsa, hammamiz qirilib ketamiz — ku!

³¹Shunda oʻgʻillari: — Singlimizga fohishaday muomala qilishlariga yoʻl qoʻymaymiz! — deb e’tiroz bildirdilar.