Read Uzbek Muqaddas Kitob Ibtido 35 Bible Online

Ibtido 35 - Uzbek Muqaddas Kitob bible

Ibtido 35

¹Xudo Yoqubga dedi: — Qani, otlan, Baytilga koʻchib bor, oʻsha yerda joylashib, Menga atab qurbongoh oʻrnat. Sen akang Esovdan qochib ketayotganingda, Men u yerda senga zohir boʻlgan edim[261].

²Yoqub xonadonidagilarga va yonidagilarga aytdi: — Begona xudolaringizni yoʻqotinglar, oʻzlaringizni poklab, toza kiyimlaringizni kiyinglar.

³Endi bu yerdan ketib, Baytilga boramiz. U yerda men Xudoga qurbongoh quraman. Kulfatda qolganimda, Xudo menga madad bergan edi. Qayerga borsam, U men bilan birga boʻldi.

⁴Hammalari begona xudolarini, ziraklarini[262] Yoqubga berishdi. Yoqub bu narsalarni Shakam yaqinidagi eman daraxtining[263] ostiga koʻmdi.

⁵Yoqub xonadonidagilarini boshlab yoʻlga tushganda, Xudo butun atrofdagi shaharlar aholisiga qoʻrquv yubordi. Shuning uchun hech kim ularni ta’qib qilmadi.

⁶Nihoyat, Yoqub butun xonadon ahlini boshlab Luz shahriga yetib keldi. (Luz hozir Baytil deb yuritiladi.)

⁷Yoqub bu yerda bir qurbongoh qurib, bu joyni Baytilning Xudosi[264] deb atadi. Yoqub akasidan qochib ketayotganda, Xudo Oʻzini unga shu yerda zohir qilgan edi.

⁸Shu orada Rivqoning enagasi Dobira vafot etdi[265]. Uni Baytilning yonidagi eman daraxti ostiga dafn qildilar. Oʻshandan buyon bu daraxt Yigʻi daraxti[266] deb yuritiladi.

⁹Yoqub Paddon — Oramdan[267] qaytib kelgandan keyin, Xudo unga yana zohir boʻldi va unga marhamat koʻrsatib, dedi:

¹⁰“Sening isming Yoqub, lekin bundan keyin seni Yoqub[268] deb chaqirmaydilar, sening isming Isroil[269] boʻladi.” Shuning uchun u Isroil deb nom oldi.

¹¹Xudo shunday dedi: — Men Qodir Xudoman, barakali boʻl, nasling koʻp boʻlsin. Buyuk xalq, hatto koʻp xalqlar sendan paydo boʻladi. Sen shohlarning bobosi boʻlasan.

¹²Men Ibrohimga va Is’hoqqa va’da qilgan yurtni senga beraman. Sendan keyin bu yerni naslingga beraman.

¹³Shundan keyin Xudo Yoqubga gapirgan joyidan ketdi.

¹⁴Yoqub oʻsha joyga yodgorlik toshi oʻrnatdi. Soʻngra yodgorlik toshi ustiga Xudoga atab sharob va zaytun moyi quydi.

¹⁵Yoqub bu joyga Baytil[270] deb nom berdi.

¹⁶Yoqub bilan uning oilasi Baytildan chiqib, Efrat tomon yoʻl oldilar. Ular Efratga hali yetib bormasdan, Rohilaning koʻzi yoriydigan payti keldi, uni qattiq toʻlgʻoq tutib qoldi.

¹⁷Rohila toʻlgʻoqdan koʻp azob chekkandan keyin, nihoyat, doyasi: “Qoʻrqma, yana oʻgʻil tugʻding”, dedi.

¹⁸Rohila jon berayotganda, oxirgi nafasda oʻgʻlining ismini Benoʻn deb qoʻydi. Otasi esa unga Benyamin[271] deb ism qoʻydi.

¹⁹Shunday qilib, Rohila vafot etdi va Efrat yoʻlida dafn qilindi. (Efrat hozir Baytlahm[272] deb yuritiladi.)

²⁰Yoqub Rohilaning qabriga yodgorlik toshi oʻrnatdi. Bu tosh shu kungacha[273] bor.

²¹Shundan keyin Yoqub[274] yana koʻchib, Eder minorasi ortida chodirini tikdi.

²²Yoqub oʻsha yerda yashayotganda, Ruben otasining choʻrisi[275] Bilxaxning yoniga kirdi[276]. Yoqub buni eshitib qoldi. Yoqubning oʻn ikkita oʻgʻli bor edi:

²³Leax tuqqan oʻgʻillari — Ruben (Yoqubning toʻngʻich oʻgʻli), Shimoʻn, Levi, Yahudo, Issaxor va Zabulun.

²⁴Rohila tuqqan oʻgʻillari — Yusuf bilan Benyamin.

²⁵Rohilaning choʻrisi Bilxax tuqqan oʻgʻillari — Dan bilan Naftali.

²⁶Leaxning choʻrisi Zilpo tuqqan oʻgʻillari — Gad bilan Osher. Yoqubning Paddon — Oramda tugʻilgan oʻgʻillari ana shular edi.

²⁷Yoqub Mamrega — Xirat — Arbaga otasining uyiga keldi. (Xirat — Arba hozir Xevron deb yuritiladi.) Ibrohim va Is’hoq Xevronda istiqomat qilgan edilar.

²⁸Is’hoq 180 yil umr koʻrdi.

²⁹U keksayib, yoshini yashab olamdan oʻtdi. Oʻgʻillari Esov bilan Yoqub uni dafn qilishdi.