Read Uzbek Muqaddas Kitob Ibtido 46 Bible Online

Ibtido 46 - Uzbek Muqaddas Kitob bible

Ibtido 46

¹Shunday qilib, Yoqub[321] butun mol — mulkini olib, yoʻlga chiqdi. U Bershebaga[322] yetib kelib, otasi Is’hoqning Xudosiga qurbonliklar qildi.

²Tunda Xudodan Yoqubga vahiy keldi: — Yoqub! Yoqub! — Labbay! — dedi u.

³— Men Xudoman, otangning Xudosiman, — dedi Xudo. — Qoʻrqmasdan Misrga boraver, Men u yerda sendan buyuk xalq yarataman.

⁴Men sen bilan birga Misrga boraman. Sen Yusufning qoʻlida jon berasan. Vaqti kelib, Sening naslingni Oʻzim Misrdan olib chiqaman.

⁵Soʻngra Yoqub Bershebadan ketdi. Oʻgʻillar otasini, bolalarini, xotinlarini fir’avn yuborgan aravalarga oʻtqazdilar.

⁶Ular Kan’onda orttirgan chorvasini, hamma mol — mulkini olib, Misrga ketdilar. Yoqub va uning hamma oila a’zolari

⁷— oʻgʻillari, qizlari va nabiralari ketdilar.

⁸Misrga ketgan Isroil xalqi, ya’ni Yoqub naslining ismlari quyidagichadir: Yoqubning toʻngʻich oʻgʻli Ruben va

⁹uning oʻgʻillari — Xanoʻx, Palluv, Xazron va Karmi.

¹⁰Shimoʻn va uning oʻgʻillari — Yamuvol, Yomin, Oxad, Yoxin, Zoʻxar va Shovul. (Shovulning onasi Kan’onlik edi.)

¹¹Levi va uning oʻgʻillari — Gershon, Qohot, Marori.

¹²Yahudo va uning oʻgʻillari — Gʻur, Oʻnan, Shelo, Paraz va Zerax. (Lekin Gʻur va Oʻnan Kan’on yurtida vafot etgan edilar[323].) Paraz va uning oʻgʻillari — Xazron va Xomul.

¹³Issaxor va uning oʻgʻillari — Toʻlo, Puvax, Yoshuv[324] va Shimron.

¹⁴Zabulun va uning oʻgʻillari — Sared, Eloʻn va Yaxliyol.

¹⁵Leaxning bu oʻgʻillari va qizi Dina Paddon — Oramda[325] tugʻilgan edilar. Yoqubning Leaxdan tarqalgan nasli jami boʻlib oʻttiz uch kishi edi.

¹⁶Gad va uning oʻgʻillari — Zafoʻn[326], Xagi, Shuno, Ezboʻn, Eri, Aroʻd[327] va Erali.

¹⁷Osher va uning oʻgʻillari — Yimnax, Yishvo, Yishvi va Bariyo. Bularning Serax degan singillari ham bor edi. Bariyoning oʻgʻillari — Xaber va Malxiyol.

¹⁸Zilpo Yoqubga tugʻib bergan nasl ana shulardir. Ular hammasi boʻlib oʻn olti kishi edi. Lobon Zilponi qizi Leaxga choʻri qilib bergan edi.

¹⁹Yoqubning xotini Rohila tuqqan oʻgʻillar — Yusuf bilan Benyamin.

²⁰Yusuf Misr yurtida ikki oʻgʻil — Manashe va Efrayimni koʻrdi. Yusufning xotini Osanat On shahrining[328] ruhoniysi Poʻtiferoning qizi edi.

²¹Benyamin oʻgʻillari — Belax, Boxir, Oshbol, Gera, Noʻmon, Exi, Roʻsh, Mupim, Xupim va Ard.

²²Yoqubning Rohiladan tarqalgan nasli ana shulardir. Ular hammasi boʻlib oʻn toʻrt kishi edi.

²³Dan va uning oʻgʻli — Xushim.

²⁴Naftali va uning oʻgʻillari — Yaxziyol, Goʻno, Izar va Shillem.

²⁵Yoqubning Bilxaxdan tarqalgan nasli ana shulardir. Bilxaxni Lobon qizi Rohilaga choʻri qilib bergan edi. Hammasi boʻlib yetti kishi edi.

²⁶Yoqub bilan birga Misrga kelgan uning nasli hammasi boʻlib oltmish olti kishi[329] edi. Kelinlari bu hisobga kirmasdi.

²⁷Yusuf Misrda ikki oʻgʻil koʻrgan edi. Shunday qilib, Yoqub xonadonidan Misrga kelganlar hammasi boʻlib yetmish kishi[330] edi.

²⁸Yoqub Yahudoni Yusufning oldiga: “Bizni Goʻshen yerlarida[331] kutib ol” degan xabar bilan oʻzlaridan oldin joʻnatdi. Ular Goʻshenga yetib kelganlarida,

²⁹Yusuf aravasini qoʻshib, otasini kutib olish uchun Goʻshenga bordi. Yusuf otasini koʻrishi bilanoq, uni quchoqlab, boʻyniga osilib, uzoq yigʻladi.

³⁰Yoqub Yusufga: — Tirik ekaningni koʻzlarim bilan koʻrdim, endi oʻlsam ham armonim yoʻq, — dedi.

³¹Yusuf aka — ukalariga, otasi xonadonining qolgan ahliga dedi: — Men borib, fir’avnga: “Kan’on yurtidan aka — ukalarim, otamning qolgan oila a’zolari mening oldimga kelishdi”, deb xabar berayin.

³²Men fir’avnga yana: “Ular choʻpon, chorvadorlik bilan shugʻullanishadi, mol — qoʻylarini, bor mulkini olib kelishibdi”, deb aytayin.

³³Fir’avn sizlarni chaqirib: “Kasb — koringiz nima?” deb soʻrab qolsa,

³⁴unga: “Biz, qullaringiz, yoshligimizdan hozirgacha choʻponlik bilan mashgʻulmiz, ota — bobolarimiz ham choʻpon boʻlib oʻtishgan”, deb aytinglar. Toki Goʻshen yerlariga oʻrnashib olishlaringizga u ijozat bersin. Chunki Misrliklar choʻponlardan hazar qilishadi.