Read Uzbek Muqaddas Kitob Ibtido 49 Bible Online

Ibtido 49 - Uzbek Muqaddas Kitob bible

Ibtido 49

¹Yoqub oʻgʻillarini huzuriga chorlab dedi: “Yonimga kelinglar, kelgusida sizlarga nima boʻlishini aytay.

²Keling, quloq soling, ey Yoqub oʻgʻillari, Eshiting otangiz Isroilning soʻzlarini.

³Ruben, sensan mening toʻngʻichim, Quvvatimning ilk mevasi, ham qudratim, Shuhratu qudratda yuksagi sensan.

⁴Lekin dengiz toʻlqiniday betizginsan, Bundan keyin aslo ustun boʻlmaysan. Otangning yotogʻiga sen kirding, Toʻshagimga chiqib, uni bulgʻading[351].

⁵Shimoʻn bilan Levi hamtovoqlardir, Qilichlari jabr — jafo qurolidir[352].

⁶Hech qachon sherik boʻlmasman ularning fitnalariga, Aslo qoʻshilmasman ularning yigʻinlariga. Ular gʻazab ila oʻldirdilar insonlarni, Rohatlanish uchun mayib qildilar hoʻkizlarni.

⁷La’nat boʻlsin ularning rahmsiz gʻazabiga, La’nat boʻlsin ularning beayov zulmlariga! Tarqatib yuboraman ularni har tomonga, Yoqubning yurtida — Isroilning yurtida.

⁸Ey Yahudo[353], seni madh etar birodarlaring, Gʻanimlaring gardanida boʻlar qoʻllaring. Senga ta’zim qilishar otangning oʻgʻillari.

⁹Yahudo sherning bolasiga oʻxshar, Oʻgʻlim, ovdan qaytib kelding sen, Sherdek choʻkib, choʻzilib yotarsan. Seni uygʻotmoqqa kim jur’at etar?!

¹⁰Yahudoning qoʻlidan ketmas saltanat hassasi[354], Uning naslida qolar saltanat tamgʻasi, Xalqlar unga oʻlpon keltirarlar[355], Unga itoat etib ta’zim qilarlar.

¹¹Eshagini u doim bogʻlaydi tokka, Xoʻtikchani — tok novdasiga. Sharobda yuvadi kiyimlarini A’lo sharobda — koʻylaklarini[356].

¹²Sharobdan ham qora koʻzlari, Sutdan ham oppoq tishlari[357].

¹³Zabulun oʻrnashadi dengiz boʻyida, Kemalarga u bandargoh boʻlajak. Uning chegarasi Sidongacha[358] borajak.

¹⁴Issaxor qoʻrada[359] oʻrnashib yotgan Kuchli eshakka oʻxshar.

¹⁵Koʻrsaki, oʻrnashgan yeri naqadar yaxshi, Juda yoqimli ekan bu joylar. Yukni koʻtarmak chun yelkasin tutdi, Ogʻir mehnatga u qul boʻlib qoldi.

¹⁶Isroil qabilasining bittasi boʻlib, Dan[360] oʻz xalqini hukm qiladi.

¹⁷Dan yoʻlda yotgan bir ilon boʻladi, Soʻqmoqda choʻzilib yotgan zaharli ilon. Otlarning toʻpigʻini u chaqib olar, Chavandoz yiqilar, chalqancha tushar.

¹⁸Sendan najot kutarman, ey Egam![361]

¹⁹Gadni[362] talab ketadi bosqinchilar, Gad ularning izidan bostirib borar.

²⁰Osher tansiq taom yetishtirar, Shohona noz — ne’matlar tayyorlar.

²¹Naftali ozod yurgan ohuga oʻxshar, Ajoyib ohuchalar dunyoga keltirar[363].

²²Yusuf oʻxshar serhosil tokka — Buloq boʻyidagi serhosil uzumga. Uning novdalari devordan oshib oʻtar[364].

²³Rahmsiz kamonkashlar unga hujum qilishdi, Oʻq otishdi unga, qattiq siqishdi.

²⁴Lekin Yusufning kamoni tarang tortildi, Uning qoʻllari ham chaqqonlashdi Yoqubning qudratli Xudosi kuchi tufayli, Isroilning Choʻponi, Qoyasi tufayli.

²⁵Otangning Xudosi senga madad bergay, Qodir Xudo senga marhamat koʻrsatgay Yuqoridagi osmon barakalari ila, Yer qa’ridan chiqqan suvning barakalari ila, Ona koʻkragiyu pushtining barakasi ila.

²⁶Abadiy togʻlar barakasidan[365] ham, Qadim tepaliklar ne’matidan ham, Otangning duolari kuchlidir. Bu barakalar Yusufga nasib etar, Birodarlari ichra u yoʻlboshchi boʻlar.

²⁷Benyamin och boʻriga oʻxshar, Sabohda u oʻljasini yamlab yutar, Oqshomda u topganini boʻlishar.”

²⁸Isroilning oʻn ikki qabilasi ana shular boʻlib, otasi ularni duo qilganda, yuqoridagi soʻzlarni aytgan edi. Har birini oʻziga loyiq tarzda duo qildi.

²⁹Shundan soʻng Yoqub oʻgʻillariga vasiyat qildi: — Mening kunim bitib boryapti. Meni Xet xalqidan Efroʻnning dalasidagi gʻorga — ota — bobolarim yoniga dafn qilinglar.

³⁰Oʻsha gʻor Kan’on yurtida, Mamre sharqida joylashgan Maxpaladagi dalada. Bobom Ibrohim bu dalani Efroʻndan qabriston uchun sotib olgan.

³¹U yerga bobom Ibrohim bilan buvim Sora dafn qilingan[366]. Otam Is’hoq bilan onam Rivqo ham u yerga dafn qilingan. U yerga men Leaxni dafn qilganman.

³²Bobom Ibrohim Xet xalqidan sotib olgan gʻor oʻshadir.

³³Yoqub oʻgʻillariga vasiyat qilib boʻlgach, yana toʻshagiga yotdi — yu, joni uzilib, ota — bobolari yoniga ketdi.